Oila baxti

Bu dunyoda baxtiyor, ahil-inoq, toʻkis yashashni kim ham orzu qilmaydi, deysiz? Biroq bu haqda orzu qilishning oʻzi yetarli boʻlmaydi. Har qanday baxt, yaxshi turmushga kishi halol mehnatlari, orzu-intilishlari tufayli erishadi.

Oʻzlarining fidoyi mehnatlari, yaxshi amallari bilan mahallamizda obroʻ-eʼtiborga, hurmatga ega Olimboy Ahmedovning xonadonini haqiqiy baxtiyor oilalardan biri desam, xato boʻlmas.

Ularning xonadoniga bosh suqqan kishi ostonadayoq saranjom-sarishtalik, ozodalikni koʻrib bahri-dili ochiladi. Shunday yashashga ne yetsin, deya oʻylaydi.

Olimboy Ahmedov ayni kunda koʻp tarmoqli xususiy firma faoliyatiga rahbarlik qiladi. Turmush oʻrtogʻi Roziya Qut-limurodova esa uzoq yillar 31-sonli umumtaʼlim maktabiga rahbarlik qildi, oʻquvchilarga matematika fanidan saboq berdi.

Ayni kunda keksalik nafaqasida boʻlishiga qaramay, oʻz mahallasida koʻptarmoqli firmaga qarashli oziq-ovqat doʻkoni qurib, elga xizmat qilayapti. Doʻkon peshtaxtalaridagi sar-xil va sifatli oziq-ovqat mahsulotlari qoʻni-qoʻshni, mahalladoshlariga ham manzur boʻlayotgani tufayli opaning huzuridan odam arimaydi. Kimdir oilasining biron ehtiyoji uchun kirsa, kimdir oilasidagi biron muammosiga maslahat soʻrab kiradi, baʼzan shu atrofga yoʻli tushgan shogirdlari opadan hol soʻrab oʻtadi.

Roziya opa uchun bularning bari – yaʼni birovlarga kerakligi, yoʻqlagani baxt. U har kuni mamlakatimiz poytaxti – Toshkentda yashab, "Perfectum mobile” aloqa kompaniyasida direktor oʻrinbosari boʻlib ishlaydigan oʻgʻli Mansur, kelini Mahfuza, qizi - onkolog shifokor Maʼmura, tuman hokimligida mutaxassis boʻlib ishlaydigan Timur, kelini Dinora, kenjatoy oʻgʻli - melioratsiya sohasi mutaxassisi Jasur bilan tez-tez hol-ahvol soʻrashib, yoʻl-yoʻriq berib, nevaralarining ahvolidan boxabar boʻlib turishga ham vaqt topadi.

Farzandlari kamolidan koʻngli toʻq Olimboy Ahmedov va Roziya Qutlimurodovalar boʻsh vaqtlarini nevaralariga bagʻishlashadi.

- Nevara farzanddan ham shirin boʻladi, deganlari rost ekan, - deydi kulib opa. Uning qalbida oʻzbekona bagʻrikenglik, mehribonlik va hayotdan zavq olib yashay olish, borini el bilan baham koʻrishdan quvonish kabi bebaho fazilatlar mujassam ekanligini angladim.

Halol mehnatlari evaziga "Qoraqalpogʻiston xalq taʼlimi aʼlochisi” unvonini olishga muyassar boʻlgan opa bilan xayrlashar ekanman, oilangizdagi xotirjamlik, baxtiyorlik doim barqaror boʻlsin, deya tiladim.

Aziza MADRAHIMOVA.