Oiladagi muhit

Mustaqillik yillarida yurtimizda oilalarni har jihatdan mustahkamlash borasida ulkan ishlar amalga oshirildi.

Oila ishlarining yurishishi, uning sogʻlom va mustahkam boʻlishi, oila maʼnaviy muhitining musaffoligi uning har bir aʼzosi xatti-harakatiga bogʻliqdir. Avvalo ota-onaning bir-birlariga munosabati samimiy, oʻzaro hurmat asosida qurilsagina bunday oilada musaffo maʼnaviy muhit vujudga keladi. Aksincha, ularning bir-biriga qoʻpol muomilasi, betakallufligi, hayotiy qiyinchiliklarni yengishda, bolalar tarbiyasida, oilaning moddiy taʼminotidagi turfa fikrlilik oʻzaro munosabalarga darz tushiradi. Har narsada sabrlilik, oilaviy muammolarni oʻylab, aql-zakovat bilan hamjihatlikda hal etish, oʻzaro mehribonlik, farzandlarga shirin muomala, har ikkala tomonning qarindosh-urugʻlariga, qoʻni-qoʻshnilarga mehr-muhabbat bilan qarash, haqiqatni axloq-odob meʼyorlari darajasida gapirish esa oila muhitini poklaydi. Shuningdek, ichish, chekish, yolgʻonchilik, dimogʻdorlik, manmanlik va boshqa shu kabi illatlardan xolilik ham oila madaniyatining yuksalishiga soʻzsiz ijobiy taʼsir koʻrsatadi.

Jumladan, ota-onalarning bir-biriga “siz”lab gapirishi, yoʻlga otlanganda “eson-omon borib keling”, “safaringiz bexatar boʻlsin”, kutib olganda “hormang”, “yaxshi borib keldingizmi?” kabi lutflarni ishlatishi farzandning ota-onaga nisbatan hurmatini, mehr-muhabbatini oshiradi, ota-ona ular uchun ibrat boʻlib qolishini taʼminlaydi. Chunki insonning eng sof va pokiza tuygʻulari, ilk hayotiy tushuncha va tasavvurlari birinchi galda oila bagʻrida shakllanadi. Xalqimizning “Qush uyasida koʻrganini qiladi”, degan dono maqoli mana shu azaliy haqiqatni yaqqol aks ettiradi.

Oila mustaqilligining yana bir sharti – unda hukmronlik qiladigan maʼnaviy muhit bilan bogʻliq. Bu muhitning sogʻlomligiga erishish uchun mamlakatimizda juda katta ishlar olib borilmoqda. Jumladan, yoshlarni ham jismonan, ham maʼnan sogʻlom voyaga yetkazish masalasiga barcha tashkilot va muassasalarining diqqat-eʼtibori qaratilgan. Bu sharoitlardan toʻgʻri foydalangan yoshlarimizning erishayotgan yutuqlari esa oʻzlari tugʻilib, voyaga yetgan oilaninggina emas, butun xalqimizning, yurtimizning yutugʻidir.

Nodira Joʻlliboyeva.