SAYLOV KODEKSI LOYIHASI KENG MUHOKAMA QILINDI
Prezidentimiz Shavkat Mirziyoyev 2017-yil 22-dekabrdagi Oliy Majlisga Murojaatnomasida Oʻzbekiston Respublikasining saylov Kodeksini ishlab chiqish va qabul qilish vazifasini qoʻygan edi.
Shunga muvofiq va Harakatlar strategiyasini «Faol tadbirkorlik, innovatsion gʻoyalar va texnologiyalarni qoʻllab-quvvatlash yili»da amalga oshirishga oid davlat dasturi ijrosini taʼminlash maqsadida davlatimiz rahbari tomonidan belgilangan vazifalardan kelib chiqqan holda saylov Kodeksi loyihasi ishlab chiqildi.
25-avgust kuni tuman hokimligida ushbu loyiha muhokamasiga bagʻishlab yigʻilish oʻtkazildi. Yigʻilishda Qoraqalpogʻiston Respublikasi Joʻqorgʻi Kengesi deputatlari A.Bayrieva, X.Yeshimbetov, Qoraqalpoq Davlat Universiteti professor-oʻqituvchisi M.Najimov soʻzga chiqib, saylov Kodeksi loyihasi ahamiyati va uning muhim jihatlari, saylov qonunchiligiga kiritilayotgan yangi qoidalar mazmun-mohiyati haqida batafsil soʻz yuritdilar.
Saylov Kodeksi loyihasida Oʻzbekiston Respublikasining saylovlar boʻyicha amaldagi “Fuqarolarning saylov huquqlari kafolatlari toʻgʻrisida”gi, “Oʻzbekiston Respublikasi Oliy Majlisiga saylov toʻgʻrisida”gi, “Oʻzbekiston Respublikasi Prezidenti saylovi toʻgʻrisida”gi, “Xalq deputatlari viloyat, tuman, shahar Kengashlariga saylov toʻgʻrisida”gi va “Oʻzbekiston Respublikasi Markaziy saylov komissiyasi toʻgʻrisida”gi Qonunlarni unifikatsiyalash koʻzda tutilganligi taʼkidlandi.
Hozirgi vaqtda loyiha Oʻzbekiston Respublikasi normativ-huquqiy hujjatlar loyihalari muhokamasi portalida jamoatchilik muhokamasiga qoʻyilgan. Shuningdek, loyiha Oʻzbekiston Respublikasi Markaziy saylov komissiyasining rasmiy saytida oʻzbek va rus tilida ham joylashtirilgan. Saylov, Kodeksi loyihasi 2 qism, 18 bob, 100 moddadan iborat.
Oʻzaro muloqot va fikr almashish shaklida oʻtkazilgan yigʻilishda xalq deputatlari tuman Kengashi deputatlari, siyosiy partiyalarning tuman Kengashlari xodimlari, shuningdek, oʻtgan yillar davomida boʻlib oʻtgan saylovlarda okrug va uchastka saylov komissiyalari tarkibida ishtirok etgan mutasaddilar Kodeks loyihasi boʻyicha oʻz takliflarini bildirib, oʻzlarini qiziqtirgan savollarga atroflicha javob olishdi.
O.XUDOYBERGANOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
