YoSh AVLOD TAʼLIM-TARBIYaSI YOʻLIDA KAMARBASTAMIZ

Maktabgacha taʼlim sohasi taʼlimning eng dastlabki va asosiy bosqichi hisoblanadi. Chunki kelajagimiz boʻlgan yosh avlod eng avvalo shu maskanda taʼlim-tarbiya oladi, har tomonlama rivojlanadi hamda kelajak uchun oʻzining ilk qadamlarini qoʻyadi.

Prezidentimizning 2017-yil 30-sentyabrdagi “Maktabgacha taʼlim tizimi boshqaruvini tubdan takomillashtirish chora-tadbirlari toʻgʻrisida”gi Farmoni hamda “Oʻzbekiston Respublikasi Maktabgacha taʼlim vazirligi faoliyatini tashkil etish toʻgʻrisida”gi qaroriga muvofiq sohada yangi tizim yaratildi.

Yangi vazirlik oldiga maktabgacha taʼlim sohasida yagona davlat siyosatini ishlab chiqish va amalga oshirish, maktabgacha taʼlim muassasalari davlat va nodavlat tarmogʻini kengaytirish, bu borada sogʻlom raqobatni qoʻllab-quvvatlash, MTMlar moddiy-texnik bazasini mustahkamlash, MTMlarga bolalarni qamrab olish darajasini oshirish va ularni maktab taʼlimiga sifatli tayyorlash vazifalari qoʻyildi.

Shu maqsadda tumanimizda yangi tashkil etilgan Maktabgacha taʼlim boʻlimi MTMlarni kichkintoy bolajonlarga bilim asoslarini, eng zarur hayotiy tushuncha va koʻnikmalarni oʻrgatadigan maskanga aylantirishga va bunday muassasalar sonini koʻpaytirishga intilmoqda.

Boisi, qaysi sohani olib qaramaylik, yetuk va bilimdon kadrlar salohiyati yutuqlarga asos boʻlayotganini koʻrishimiz mumkin.

Biz ana shunday istiqboli porloq kadrlar tayyorlashni bolaning maktabgacha taʼlim tizimidan boshlasak, albatta, niyatimizga yetamiz. Axir maktabgacha taʼlim tizimi uzluksiz taʼlimning ilk va eng asosiy boʻgʻini hisoblanadi.

Tuman Davlat xizmatlari markazida “Bolalarni davlat maktabgacha taʼlim muassasalariga qabul qilish va navbatga qoʻyish boʻyicha elektron dastur”ning joriy etilgani farzandlarini MTMlarga joylashtirish yoki biridan ikkinchisiga koʻchirish istagida boʻlgan ota-onalar uchun yana bir qulaylik boʻldi.

Bundan tashqari, tumanimizda maktabgacha taʼlim tizimini rivojlantirish boʻyicha bir qancha samarali ishlar amalga oshirilmoqda. Maktabgacha taʼlim muassasalarida tarbiyalanuvchilarning zamonaviy taʼlim-tarbiya olishlari, ularning sogʻlom ovqatlanishi hamda jismonan va ruhan yetuk boʻlib yetishishlari uchun barcha shart-sharoitlar yaratib berilmoqda. Maktabgacha taʼlim muassasalarini malakali pedagog xodimlar bilan taʼminlash chora-tadbirlari amalga oshirilmoqda.

Maktabgacha taʼlim muassasasi tarbiyachisi kasbi nihoyatda masʼuliyatli, mashaqqatli kasbdir. Chunki, ular tarbiyalanuvchilarning har tomonlama yetuk, barkamol va sogʻlom boʻlib tarbiyalanishida masʼul boʻlib hisoblanadi.

Yurtimizda 1-oktyabr Oʻqituvchi va murabbiylar kuni sifatida keng nishonlanadi. Shu fursatdan foydalanib, nafaqat tumanimizdagi, balki yurtimizdagi barcha oʻqituvchi va murabbiylarni bayram bilan chin qalbimdan muborakbod etaman.

Ularning mashaqqatli va masʼuliyatli ishlarida muvaffaqiyat, oilalariga tinchlik-totuvlik, tani sogʻliq, kuch-gʻayrat va shijoat tilab qolaman. Hamisha qaddingiz va qadringiz baland boʻlsin, aziz ustoz va murabbiylar!

Oʻktam QOʻShNAZAROV,

tuman Maktabgacha taʼlim boʻlimi mudiri.