OʻQITUVChI

Bugun yorqinroq nur sochganday oftob,

Bermoqda borliqqa harorat-la tob.

Chunki muhtaramlar ichra muhtaram –

Zotlar uchun ochdi zamon yangi bob.

Shogirdlar deyinmi yoki kasbdosh,

Sizga quvonch ila aylayman xitob:

Yurtboshi shahdi-la har bir jabhada

Buyuk islohotlar – goʻyo inqilob!

Qadringiz chaqaga tenglagan edi

“Oʻzimizdan chiqqan” bir necha arbob.

Dodingni aytarga dodgoh topolmay

Dardlaring ichingda edi, dil kabob.

Ustoz, murabbiylik qayta topdi shon,

Endi sizdan gʻayrat – munosib javob.

Yangicha uslublar toping, kashf eting

Imkon, vaqt bemalol oʻqishga kitob.

Ilmingiz oshiring, ijodga shoʻngʻing:

Kechqurun fermerga bermaysiz hisob.

“Koʻchani tozala! Gazga pul yigʻ”, deb

Oqsoqol zarda-la qilolmas itob.

Elga fido boʻlmoq fursati yetdi,

Vatan Sizdan soʻrar yutuq – sarhisob.

Oʻrganing, oʻrgating ilmsizlik uyat,

Ilmsiz boylik ham bir koʻpik – hubob.

Dunyoni yelkaga olar shogirdlar

Sidq ila oʻrgating fanlarni bob-bob.

Shogirdlar “ustoz”, el “domla” deb siylar,

Bu ulkan mukofot, tengi yoʻq savob.

Takror umr berib: “tanla kasb”, desa,

Yana muallimlik soʻrardim shitob.

Bayram ham muborak! Sogʻ, omon boʻling,

Tilayman yorugʻ yuz, umr fayziyob!

Tursunboy ABDULLAYeV.