TERIM QIZGʻIN DAVOM ETMOQDA

“Kuyukkoʻpir” ovulidagi “Doston paxtakor” fermer xoʻjaligining jami yer maydoni 41 gektarni tashkil qiladi. Bu yil shundan 27 gektariga paxta ekildi. Dehqonlar uchun ogʻir kechgan bu yilgi sharoitga qaramasdan barcha qiyinchiliklarni yengib oʻtgan xoʻjalik ishchilari daladagi gʻoʻza nihollarini yetiltirib parvarishlashga erishishdi.

–Paxta ekilgan barcha maydonlardagi gʻoʻza qator oralari har sugʻorish oldidan shudgor qilindi-, deya soʻzlaydi fermer xoʻjalik raisi Amin Matyakubov.

–Sugʻorish bilan birga mahalliy oʻgʻit bilan sharbat usulida oziqlantirilib ham borildi. Nihollarni oziqlantirishda kimyoviy oʻgʻitdan ham foydalanildi. Ishchilar bilan birgalikda paxtadan moʻl hosil yetishtirish uchun bor kuch-gʻayratimizni sarfladik.

“Doston paxtakor” fermer xoʻjaligida paxta dalalaridagi hosilni terib olishga 11 nafar pudratchidan tashqari, 60 dan ziyod terimchilar jalb qilindi. Ilgʻor terimchilardan Zamira Ernazarova, Dildora Tangriberganova, Oliya Matyokubova, Nigora Bobojonova va boshqalar kuniga 100 kg.dan ziyod paxta terib topshirib, xoʻjalikning rejasi muddatidan oldin bajarildi. Davlatga rejadagi 54 tonna oʻrniga shu kunga qadar 63 tonna paxta topshirildi. Fermer xoʻjalik terimchilariga terilgan paxta uchun shu kunning oʻzida ham toʻlab borilmoqda. Shuningdek, tushlik mahalida issiq ovqat ham berilmoqda.

-Biz hozircha paxtadan 100 mln.dan ziyod sof daromad olishni chamalayapmiz. Shunga yarasha rejalarimiz ham bor. Xoʻjaligimiz tomorqalarini kengaytirib, servis xizmat koʻrsatishni yoʻlga qoʻyishni va ish oʻrinlarini koʻoʻraytirishni moʻljallayapmiz-, deydi mamnuniyat bilan “Doston paxtakor” fermer xoʻjaligi raisi Amin Matyokubov.

Xoʻjalik dalalarida hali hosil moʻl. Tergan paxtalari uchun har kuni pul olib, mablagʻga ega boʻlayotgan terimchilar koʻtarinki ruh bilan terim surʼatini yanada oshirishmoqda.

O.XUDOYBERGANOVA.