KONSTANTIN MIXAYLOVICh OGAY – UNI HAMMA KOSTYa AKA, DEP EDI

1935-yilda Primore oʻlkasida yashovchi oddiy xonadonlarning birida oʻgʻil farzand dunyoga keldi. Ota-onalari, albatta, farzandining yaxshi inson boʻlib yetishishini orzu qilib duo qilganligi aniq. Lekin oʻgʻlonning kelajakda olis Oʻzbekiston diyoriga kelib oʻqib, ulgʻayib katta bir tumanga bosh shifokor boʻlishi hech kimning yetti uxlab tushiga ham kirgan emas. Ha, xuddi shunday boʻldi ham. Taqdiri azaldan inson qochib qutula olmaydi deganlaridek, Konstantin Mixaylovich Ogayning ota-onalari tarixiy sabablar va shart-sharoitlar bilan Primore oʻlkasidan Oʻzbekistonning Xorazm viloyati, Gurlan tumanidagi “Sunde Xun” (sobiq “Kommunizm” jamoa xoʻjaligi hududi) sholikorlik xoʻjaligiga koʻchib kelishadi. Yoshgina Kostya mahalliy bolalar bilan tezda kirishib ketadi. Umumtaʼlim maktabining rus tilida oʻqitiladigan sinfida 10-sinfni bitirib chiqadi. Maktabni aʼlo baholarga bitirgan zehnli bu yigit 1954-yilning oʻzidayoq olis Novosibirsk Davlat Tibbiyot institutining davolash fakultetiga oʻqishga kiradi. Oradan olti yil oʻtib, Konstantin Ogay mazkur institutni imtiyozli diplom bilan tugatgan. Institut taqsimot hayʼati unga oʻzi oʻsib-ulgʻaygan olis Xorazm viloyatiga ishga yoʻllanma berdi. U oʻzining tibbiyot sohasidagi ilk ish faoliyatini Mangʻit shahridagi markaziy kasalxonada terapevt-shifokor boʻlib ishlashdan boshladi. Mehnatkashligi, halol va rostgoʻyligi, oʻz ustida tinimsiz izlanishi hamda bemorlarga va atrofidagilarga xushmuomalaligi bilan tezda mehnat jamoasida, el orasida obroʻ-eʼtiborga sazovor boʻla boshladi.

Natijada Konstantin Mixaylovichdagi oʻziga xos tadbirkorlik va atrofdagilar bilan muomala madaniyatining nihoyatda yuksakligi, har bir masalaning yechimini topish borasidagi odilona ilmiy yondashish xususiyatlarini hisobga olib, tuman rahbariyati ulkan jamoaning bosh shifokori oʻrinbosari lavozimiga tayinlashdi.

Uning qoʻlidan davo topganlar soni esa kundan-kun oshib, aholi orasida katta obroʻ qozondi. 1970-yilga kelib Konstantin Mixaylovich birinchi toifali terapevt darajasiga erishdi. Uni kasbdoshlari, ayniqsa, amudaryoliklar oʻzlariga yaqin olib Kostya aka, deb chaqiradigan boʻlishdi.

Mixaylovichning kasbiy salohiyati 1975-yilda Davlat attestatsiya hayʼati tomonidan oliy toifali terapevt maqomiga loyiq deb topildi. Shu tariqa u haqiqiy oʻzbek farzandi, mangʻitlik boʻlib qoldi, bu rost gap. 1978-yilda Konstantin Mixaylovich Ogayga “Qoraqalpogʻiston ASSPda xizmat koʻrsatgan shifokor” Faxriy unvoni berildi. Bu yuksak mukofot inson mehnatining qadrlanishi va millatlararo oʻzaro tinch-totuvlikning, qolaversa, sogʻliqni saqlash tizimida fidoyilik qilayotgan ilgʻor kadrlar mehnatining davlat tomonidan munosib baholanishi edi.

Biz ushbu maqolamizda Kostya akaning davolovchi shifokor sifatida jonkuyarlik koʻrsatib ishlagani, rahbar sifatidagi tashkilotchilik qobiliyati, boy bilimi, jamoatchilikning hurmatiga sazovor boʻlgan koʻp qirrali faoliyatini yoritish barobarida u kishidagi insoniy fazilatlar naqadar yuksak boʻlganini alohida eʼtirof etishni lozim topdik. U oʻz huzuriga ilinj va ishonch bilan kelgan insonlarning koʻngliga dalda berib, sogʻayib ketishiga ishontira olish qobiliyatiga ega shifokor edi.

Umr – oqar daryo. Yorugʻ dunyoga kelibmizki, uning soʻnggi manzili borligi barchamizga ayon. Lekin bu lahzani Yaratganning oʻzidan boshqa hech kim bilmaydi...

Modomiki, shunday ekan, oramizda Konstantin Mixaylovichdek el eʼzozida boʻlgan insonlarni eslab, Allohga iltijo qilamizki, ularning qabrlari nurga toʻlsin!

Qodirbergan xoji JUMAMUPOD oʻgʻli.