"Toza hudud" DUK tuman filiali qanday faoliyat olib bormoqda? (+video)

Prezidentimizning 2017-yil 21-apreldagi "2017-2021-yillarda maishiy chiqindilar bilan bogʻliq ishlarni amalga oshirish tizimini tubdan takomillashtirish va rivojlantirish chora-tadbirlari toʻgʻrisida"gi qarori ijrosi doirasida tashkil etilgan “Toza hudud” davlat unitar korxonalari hududlarda ekologiya va sanitariya muhitini yanada yaxshilash, shahar va qishloqlarning obod va koʻrkam boʻlishida muhim ahamiyatga ega. “Toza hudud” davlat unitar korxonasining tuman filiali ham bu borada samarali faoliyat olib bormoqda.

Korxona maxsus texnika va konteynerlar bilan taʼminlangan boʻlib, poligonlar hamda maxsus avtogarajlar qurish choralari koʻrilmoqda. Yuridik va jismoniy shaxslar bilan maishiy chiqindilarni yigʻish va olib chiqish xizmati koʻrsatish boʻyicha shartnoma tuzishda qishloq hududlari ham qamrab olinmoqda. Hozirgacha yuzlab yuridik tashkilotlar va jismoniy shaxslar bilan shartnomalar tuzildi va korxonaning tuman filiali tomonidan mavjud imkoniyatlardan toʻla foydalangan holda hududni toza saqlash borasida keng koʻlamli ishlar amalga oshirilayapti.

Korxona jamoasining mavjud 12 ta maxsus texnikalardan unumli foydalanishi natijasida tuman markazi va Mangʻit shahri atrofida joylashgan 4 ming 177 ta xonadonlardan qattiq maishiy chiqindilarning oʻz vaqtida olib ketilishi taʼminlanmoqda.

Shuningdek, korxona 12 ta byudjet, 138 ta xoʻjalik hisobidagi korxonalarga ham shartnoma asosida xizmat koʻrsatmoqda. Shu yilning oxirigacha tumandagi barcha ovul va mahallalar aholisiga ham korxona tomonidan xizmat koʻrsatishni tashkil etish rejalashtirilmoqda.

Shu kungacha “Toza hudud” Davlat unitar korxonasining tuman filiali tomonidan aholiga 191 million soʻmlik, yuridik tashkilotlarga 42 million soʻmlik, byudjet hisobidagi tashkilotlarga esa 105 million soʻmlik xizmatlar koʻrsatildi.

Ayni kunda Mangʻit shahridagi barcha mahallalar koʻchalarida yigʻilgan qattiq maishiy chiqindilarning shartnoma asosida tasdiqlangan jadval boʻyicha olib chiqib ketilishi taʼminlanmoqda.

Shu oʻrinda barcha yurtdoshlarimizni, jismoniy va yuridik shaxslarni qattiq maishiy chiqindilarni olib chiqib ketish boʻyicha “Toza hudud” davlat unitar korxonasi tuman filiali bilan shartnoma tuzishga chaqirib qolamiz. Oʻzimiz yashayotgan hovli, oʻzimiz mehnat qilayotgan korxona hududining tozaligi ekologiya va atrof-muhit tozaligining asosiy shartlaridan biri ekanligini unutmaylik!