JISMONIY ChINIQISh SOGʻLOM HAYoT UChUN INTILIShDIR
Xalqimiz azal-azaldan jismonan baquvvat kishilarga katta eʼtibor, hurmat va havas bilan qaragan. Xorazm elining asl farzandi, kuragi yerga tegmagan polvon Pahlavon Mahmudning jasorati va xizmati xalqning yuragidan shunday joy olganki, bugun u xalq qahramoni sifatida eʼtirof etilib, uning oxirgi qoʻnim topgan joyi butun xalqimizning sevimli ziyoratgohiga aylangan.
Bugungi kunda mustaqil Oʻzbekistonimizda oʻsib kelayotgan yoshlar uchun juda katta shart-sharoitlar yaratildiki, Respublikamizning eng chekka qishloqlarida ham jahon andozalariga mos sport inshootlari qurilib, yoshlar ixtiyoriga topshirildi. Bu maskanlarda barcha yoshlar, aholi oʻzlari istagan sport turlariga qatnashib, oʻz salomatliklarini mustahkamlamoqdalar.
Jismoniy tarbiya – umuminsoniy madaniyatning bir qismi boʻlib, oʻz salomatligini saqlash va mustahkamlash maqsadidagi harakatdir.
Jismoniy mashqlar bilan muntazam shugʻullanib turuvchi kishi davolanishga kamdan-kam muhtoj boʻladi, deb yozgan edi Abu Ali ibn Sino .
Jismoniy tarbiyaning sogʻlomlashtiruvchi va tarbiyaviy ahamiyati keng qamrovli boʻlib, jismoniy va aqliy yetuklikni taʼminlashga, sogʻliqni yaxshilashga, organizmning tashqi muhit salbiy taʼsirlariga nisbatan qarshiligini oshirishga, odamda harakat koʻnikmalarini shakllantirishga, organizmning chiniqishini taʼminlashga xizmat qiladi. Shuningdek, bolalarda faollik, tashabbuskorlik, biron masalaga jurʼat bilan kirishish, qiyinchilikdan, ogʻir mehnatdan qoʻrqmaslik, oʻrtoqlik va doʻstlik hissiyotlarini shakllantiradi.
Muntazam ravishda jismoniy mashqlar bilan shugʻullanish aholi orasida kasallanish va jarohatlanishning oldini oladi, orttirilgan baʼzi yomon odatlardan voz kechishga olib keladi, organizmda mavjud ayrim kasalliklarni davolaydi.
Xalqimizda shunday bir hikmatli soʻz bor: “Pul yoʻqotsang, hali hech narsa yoʻqotmabsan, vaqt yoʻqotsang ham kam narsa yoʻqotganing, ammo sogʻliqni yoʻqotsang, hamma narsani yoʻqotganing”. Sogʻliqni yoʻqotgandan keyin izlashdan koʻra, uni yoʻqotmasdan oldin asrash lozim. Bunda jismoniy chiniqishning oʻrni muhim. Shunday ekan, keksa-yu yosh, erkagu ayol sogʻlom yashashi uchun hamisha sportga oshno boʻlishi kerak.
Jumaboy Yavqashev, tuman Tibbiyot birlashmasining
“Salomatlik” boʻlimi mudiri.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
