XALQ OLDIDA OʻZIMIZNI IShChAN QILIB KOʻRSATIShGA HAQQIMIZ YOʻQ

Fuqarolarning oʻzini-oʻzi boshqarish organlari bugungi kunda mamlakatimizda eng xalqparvar, demokratik institut va jamiyat taraqqiyotining yetakchi boʻgʻiniga aylandi. Chunki xalqimiz ovul va mahallalarda yashab, mehnat qilishadi, oʻzlari yashab turgan hududning ijtimoiy-maʼnaviy, iqtisodiy hamda madaniy jihatdan rivojlanishida faol ishtirok etadilar va bunga oʻzlarini masʼul deb biladilar.

Biz joriy yilning 30-oktyabr sanasida Oq oltin ovul fuqarolar yigʻinida boʻlganimizda ovul aholisining ovulni har tomonlama ravnaq toptirish borasidagi ishlarda befarq emasligining guvohi boʻldik. Muammolarni muhokama qilish, faoliyat koʻrsatayotgan komissiyalar ishtirokida joylarga chiqib oʻrganish hamda ularni imkoni boricha hal etish choralari koʻrilgani bois, soʻnggi yillarda aholi tomonidan tushayotgan shi-koyat va murojaatlar ancha kamaygan. 6850 nafardan ziyod aholi istiqomat qiladigan ovul hududida aholiga zarur ijtimoiy-maishiy xizmat koʻrsatuvchi tadbirkorlar anchagina.

Biz ijodiy guruhimiz bilan ovulda boʻlgan kunimizda Oq oltin ovul fuqarolar yigʻinining vakillar yigʻilishida ovuldagi qishloq oilaviy poliklinikasi mudiri Jahongir Prmanov hamda tuman IIBning hududga biriktirilgan 30-sonli militsiya tayanch punkti profilaktika inspektori F.Abdurahimovlarning oʻz faoliyatlari boʻyicha hisobotlari tinglandi.

Fuqarolar yigʻinining Nizomiga koʻra, har chorakda bir marta fuqarolar yigʻini raisi, uning oʻrinbosarlari va maslahatchilari, yigʻin faoliyatining asosiy yoʻnalishlari boʻyicha komissiyalari hamda taftish komissiyasi raisi, “Mahalla posboni” jamoatchilik tuzilmasi rahbari hamda hududdagi militsiya tayanch punkti huquqbuzarliklar profilaktikasi boʻyicha inspektori, taʼlim muassasalari va qishloq oilaviy poliklinikalari rahbarlarining hisobotlarini eshitishi, ular faoliyatini tanqidiy va tahliliy muhokama etishlari, hatto ularning egallab turgan lavozimlariga loyiq yoki noloyiqligi yuzasidan tavsiyalar qabul qilishi belgilab qoʻyilgan.

Oq oltin ovul fuqarolar yigʻinida boʻlib oʻtgan yuqoridagi yigʻilishda esa biz ishchanlik ruhini sezmadik.

Toʻgʻri, yigʻilish barcha rasmiy qonun-qoidalarga muvofiq oʻtkazildi. Yaʼni, yigʻilishni yigʻin raisi Q.Matmurodov ochdi va olib bordi. QOP mudiri J.Prmanov hamda militsiya tayanch punki huquqbuzarliklar profilaktikasi inspektori F.Abdurahimovlar hisobot maʼruzalari qildilar. Maʼruzalar ham risoladagiday, yaʼni, bajarilgan ishlar, raqamlar bilan dalillangan misollar orqali qayd etildi. 3-qishloq oilaviy poliklinikasi mudiri J.Prmanovning hisobotiga eʼtibor beraylik: son-sanoqsiz raqamlar – hisobot davrida qancha aholi tibbiy koʻrikdan oʻtkazilgani, shulardan bolalar qancha-yu, ayollar, keksalar, shuningdek, kasallik turlari boʻyicha emlanganlar, roʻyxatda turuvchi va roʻyxatga olingan bemorlar. Xullas, raqamlar soʻzlaydi, tinglovchilar shunchaki tinglayveradi. Chunki, bu kabi maʼruzalarni xalqimiz jim oʻtirib tinglashga “odatlanishgan”. Biz esa har qanday odam yigʻilish ruhidan kelib chiqib aytishi mumkin boʻlgan bir fikrni aytishni lozim topdik: hisobot yigʻilishi zoʻrma-zoʻraki oʻtkazildi va unda faollik yetishmadi. Aholi vakillari esa hisobot yigʻilishidan koʻzlangan maqsad nima ekanligini hatto anglab ham yetmadilar.

Profilaktika inspektori F.Abdurahimovning maʼruzasiga kelsak, oʻz faoliyatini 2018-yilning oktyabr oyida boshlagan profilaktika inspektori, leytenant F.Abdurahimov 2018-yil 30-oktyabr kuni boʻlib oʻtadigan mazkur yigʻilishga qoʻlida tayyor bayonnoma (oʻzi hisobot qiladigan yigʻilish bayonnomasi!) bilan kelganining oʻzi hisobot yigʻilishi shunchaki rasmiyatchilik uchun oʻtkazilayotganining isboti emasmi?

Prezidentimiz qayerda, qanday mavzuda maʼruza qilmasin, doimo bir gapni qayta-qayta takrorlaydilar: “Xalqimiz bizdan rozi boʻlishi kerak!”.

Xalqimiz ishonch bildirib qoʻygan rahbarlar, davlat xizmatchilariki, oʻz vazifalarini bajarishda soxta maʼlumotlarga, rasmiyatchiliklarga suyanar ekanlar, xalq kimga suyanadi? Oq oltin OFY raisi shunchaki rasmiyatchilik yuzasidan rahbarlar hisobotini tinglashi kimga kerak? Aslida xalqqa ishning halolidan kelib, soʻzning mardini aytadigan, haqiqatdan ham xalq orasiga kirib borib, uning dardini tinglab, ogʻiriga yelka tutadigan rahbarning hisoboti kerak! Shunday emasmi?

Yigʻilishda 3-sonli QOP mudiri J.Prmanov oʻz maʼruzasida hududdagi ijtimoiy yordamga muhtoj aholi qatlami haqida va aholining bunday vakillari bilan shaxsan uchrashib, ularning malakali tibbiy xizmatlar olgani yo olmagani, sogʻligida jiddiy muammolari boʻlgan kishilarga tuman Tibbiyot birlashmasi malakali mutaxassislari bilan maslahatlashgan holda, ular sogʻligini tiklashlari uchun koʻrsatilayotgan amaliy yordam – reabilitatsiya markazlariga (order) yoʻllanmalar olishda koʻmaklashish masalalarida qilingan ishlar yuzasidan aniq misollar keltirmadi. Rahbar sifatida shaxsiy tashabbus koʻrsatish oʻrniga, faqat tuman Tibbiyot birlashmasi tomonidan berilgan koʻrsatmalar boʻyicha bajarilgan ishlar bilan cheklanib qolinayotganini maʼruza mazmunidan anglab olish qiyin emas.

Huquqbuzarliklar profilaktikasi inspektori F.Abdurahimovning maʼruzasi ham rasmiyatchilik yuzasidan tayyorlangan va maʼruzachi oʻz xizmat hududidagi muammolarni hali yetarlicha oʻrganib, tahlil qilmagan.

Vaholanki, yigʻin aholisi hayotida sogʻlikni saqlash va huquqiy masalalar boʻyicha yechimini kutayotgan muammolar bir talay. Bu muammolarni biz birma-bir taʼkidlab oʻtmoqchi emasmiz. Lekin bir fikrni aytishga majburmiz: Oq oltin OFY raisi Q.Matmurodov yigʻin hududidagi idora va tashkilotlar rahbarlarining hisobotlarini tashkil etish, bu hisobot yigʻilishiga aholi vakillarining faol ishtirokini taʼminlash boʻyicha yetarli tajribaga ega emas. Buni biz 30-oktyabr kuni boʻlib oʻtgan yuqoridagi yigʻilishda yaqqol koʻrdik va his etdik.

Maqolamiz intihosida OFY va MFY raislari (oqsoqollari)ning ish tutumlaridagi umumiy bir kamchilikni (balki sustkashlikdir!) roʻyi-rost aytishga majburmiz:

– OFY va MFY raislari (oqsoqollari) oʻz vakolatlari doirasidagi vazifalarni yo tushunishmaydi yoki oʻz xizmat lavozimi burchlarini ado etish boʻyicha maʼlum bilimga ega emaslar!

Bizning maqsadimiz – doimo xolis. Prezidentimiz taʼbiri bilan aytganda, oʻz vazifamizni halollik bilan bajarish va hamisha xalqqa yaqin boʻlish. Xalqimiz dardini anglab, ogʻiriga yelka tutib yashash har birimizning burchimizdir. Burchga nisbatan masʼuliyatsizlik va rasmiyatchilik bilan yondashishga, shunchaki ishlash, xalq koʻzi oldida oʻzimizni ishchan qilib koʻrsatishga aslo haqqimiz yoʻq. Xalqimizga rasmiyatchilik emas, amaliy ish kerak! Shunday emasmi?

Robiya YOʻLDOShEVA.