OʻZIDAN KOʻRA ASORATI OGʻIR KASALLIK

Kuz-qish mavsumida aholi oʻrtasida gripp kasalligi keng tarqaladi. Gripp –oʻtkir va tez yuqadigan kasallik boʻlib, uni juda mayda, hatto filtrdan ham oʻtib ketadigan viruslar keltirib chiqaradi. Kasallik keltirib chiqaradigan bu viruslarning A, B, S turlari mavjud.

Grippning asosiy manbai kasallikka chalingan inson yoki uni tashuvchilar hisoblanadi.

Gripp virusi sogʻlom odamga bemor aksirganda, yoʻtalganda yoki u bilan gaplashganda havo tomchi yoʻllari orqali oʻtishi mumkin.

Kasallik toʻsatdan, oʻtkir boshlanadi. Xavfli jihati – kasallikning yashirin davri bir necha soatdan 3 kungacha davom etadi.

Gripp kasalligiga barcha yoshdagilar moyil boʻlib, ayniqsa, nimjon, yaʼni immuniteti past bolalar, keksa yoshdagilar, homilador ayollar hamda surunkali xastaliklari boʻlgan kishilarga koʻproq yuqadi va ogʻir kechadi.

Kasallik asosan nafas yoʻllari yalligʻlanishi bilan boshlanib, keyinchalik bemorda tana harorati 38-40 darajaga koʻtarilishi, burun bitishi, burundan suyuqlik ajralishi, yoʻtal, mushaklarda ogʻriq paydo boʻlishi, bosh va tomoq ogʻrishi, holsizlik hamda ishtaha buzilishi, baʼzida esa qayt qilish holatlari kuzatiladi. Gripp oʻzidan koʻra asorati ogʻir kasallik hisoblanadi.

Kuz-qish mavsumida gripp kasalligiga chalinmaslik uchun tanani chiniqtirish, badantarbiya bilan muntazam shugʻullanish, ochiq havoda yurish, oʻz vaqtida ovqatlanish, alohida ahamiyatga ega. Qolaversa, vaqtida dam olish, xonalarni vaqti-vaqti bilan shamollatib turish, sovuq kunlarda issiq kiyinish, bosh kiyim kiyish, oyoqlar issiq boʻlishi muhimdir.

Grippga qarshi emlashning ham ahamiyati katta. Shuningdek, ishlab chiqarish korxonalari xodimlari, bolalar, qariyalar uylari, tashkilot va idoralar hamda turarjoy binolarida issiqlik rejimiga rioya qilish, barcha xonalarning issiqlik harorati 22 darajadan past boʻlmasligi lozim.

Agar kasallik belgilari paydo boʻlsa, darhol shifokorga murojaat qilish lozim.

Davron GULMIRZAYeV, tuman DSENM

epidemiolog shifokori.