Orzu qildim, askar boʻldim

Oʻzbekiston Respublikasini himoya qilish — Oʻzbekiston Respublikasi har bir fuqarosining burchidir. Fuqarolar qonunda belgilangan tartibda harbiy yoki muqobil xizmatni oʻtashga majburdirlar.

Oʻzbekiston Respublikasi Konstitutsiyasining

52-moddasi.

Har gal televizor orqali harbiylar hayotiga oid koʻrsatuvlar namoyish etilsa, ich-ichimdan havas qilardim:

- Katta boʻlsam, albatta Milliy armiya askari boʻlaman! – derdim ota-onamga.

- Armiyaga hammaniyam olavermaydi, oʻgʻlim, tanlab olishadi, - otam "shunga tayyormisan?” - degandaysinovchan gapirardilar. Men shunga intildim. Intilgan – orzusiga albatta yetisharkan. Tinimsiz sport bilan shugʻullandim, maktabda va kollejda ilm asoslarini chuqur oʻzlashtirishga harakat qildim. Oʻtgan chaqiruv mavsumida barcha tibbiy, nazariy va taktik koʻriklardan muvaffaqiyatli oʻtib, 2013-yilning 18-fevral kuni harbiy xizmatga joʻnab ketdim.

Mana, salkam bir yildan beri Andijon shahridagi umumqoʻshin tarkibiga kiruvchi harbiy qismlardan birida oʻz fuqarolik burchimni ado etayapman. Shuni quvonch bilan aytamanki, harbiy xizmat meni eng avvalo shaxs sifatida har tomonlama tobladi: dunyoqarashim, fikrlash qobiliyatim kengaydi, hatto nazariy bilimlarni, harbiy-jismoniy mashqlarni egallash borasida ham aqlan, ham jismonan va maʼnan ulgʻaydim. Endilikda siyosiy mavzudagi mashgʻulotlarda ham, harbiy mashqlarni bajarishda ham, jangovar sinov maydonlarida ham umuman qiyinchilik sezmayman. Shunday paytda muhtaram Prezidentimizning biz yoshlarga qarata aytgan daʼvatkor soʻzlarini qayta-qaytaeslayman:

" – Askar kiyimini kiyib, harbiy xizmatni oʻtagan matonatli yigitlarning barchasi mening bolalarimdir!”

Men askar boʻlib, oʻz Konstitutsiyaviy burchimni ado etishga erishayotganimdan, Oʻzbekiston Respublikasi Davlat ramzlari qarshisida tiz choʻkib, Oʻzbekiston bayrogʻini oʻpib, har bir yigit uchun orzu boʻlgan Qasamyodni qabulqilganimdan baxtiyorman. Hozirgi kunda ham oʻz postida sergak askar sifatida dilimda Qasamyodim bilan ona Vatanim sarhadlarini himoya qilishdek sharafli burchimni ado etayotirman. Barcha tengdoshlarimni, ona xalqimni, aziz Amu elimni, ota-onam va ustozlarimni 8-dekabr – Konstitutsiya kuni bilan samimiy tabriklayman.

Akbarjon Kamolov,

oddiy askar.