O’zLiDeP Amudaryo tuman Kengashi Qoraqalpogʻistonda eng namunali partiya tashkiloti deb topildi

Tadbirkorlar va ishbilarmonlar harakati – Oʻzbekiston Liberal-demokratik partiyasi tashkil qilinganiga bu yil 15-yil toʻldi. Qisqa davr ichida siyosiy maydonda oʻz oʻrniga va mavqeiga ega boʻlgan O’zLiDeP Qoraqalpogʻiston Respublikasi Kengashi tomonidan shu munosabat bilan “Eng namunali tuman partiya tashkiloti”, “Eng namunali boshlangʻich partiya tashkiloti” va “Xalq deputatlari mahalliy Kengashlaridagi eng faol deputat” tanlovlarining Respublika bosqichi oʻtkazildi.

Ustavi va Dasturida belgilangan vazifalarni joylarda targʻib qilishda hamda partiya rahbar organlarining qaror va farmoyishlarida belgilangan maqsad va vazifalarning bajarilishini taʼminlashda alohida namuna va faollik koʻrsatib kelayotgan tuman partiya tashkilotlarini har tomonlama qoʻllab-quvvatlash, moddiy va maʼnaviy ragʻbatlantirish, ularning tajribalarini ommalashtirish maqsadida oʻtkazilgan “Eng namunali tuman partiya tashkiloti” tanlovida barcha tuman va shahar Kengashlari ishtirok etishdi. Tanlovda tuman partiya tashkilotlari tomonidan amalga oshirilgan ishlar hakamlar hayʼati tomonidan koʻrib chiqildi va Siyosiy Kengashi Ijroiya qoʻmitasi qarori bilan tasdiqlangan mezonlarga asos partiyaning Amudaryo tuman Kengashi 1-oʻrin gʻolibi deb topildi. Qoraqalpogʻistonda eng namunali partiya tashkiloti deb topilgan partiyaning Amudaryo tuman Kengashi tanlovning Oʻzbekiston Respublikasi bosqichiga qatnashish huquqiga ega boʻldi.

Shuningdek, “Xalq deputatlari mahalliy Kengashlaridagi eng faol deputat” tanlovida ham tuman va shahar Kengashlari deputatlari oʻzlari saylangan hududda deputat sifatida olib borgan ishlari, xalqning ichiga kirib ularning muammolarini oʻrganish borasida qilingan ijobiy ishlari bilan ishtirok etdilar. Tanlov shartlari asosida barcha deputatlarning faoliyati hakamlar hayʼati tomonidan oʻrganib chiqilib, tanlovda ishtirok etgan Amudaryo tuman Kengashi deputati M.Beknazarovaga 3-oʻrin gʻolibligi berildi.

Partiya tashkil qilinganining 15 yilligi munosabati bilan Qoraqalpoq Davlat Yosh tomoshabinlar teatrida partiyaning Qoraqalpogʻiston Respublikasi Kengashi xodimlari, Qoraqalpogʻiston Respublikasi Joʻqorgʻi Kengesi deputatlari, tuman va shahar Kengashi deputatlari, elektorat vakillari, partiya faollari, keng jamoatchilik va OAV vakillari ishtirokida oʻtkazilgan bayram kechasida tanlov gʻoliblari ragʻbatlantirildi.

O.Xudoyberganova.