“Toʻlqin” boks maktabida iqtidorli bolalar koʻp

Bolalar sportini rivojlantirishga qaratilayotgan eʼtibor va ragʻbat tufayli tumanimiz yoshlari orasida turli miqyosdagi musobaqalar gʻoliblari safi yil sayin oshib bormoqda. Bu borada Bolalar va oʻsmirlar sport maktabiga qarashli “Toʻlqin” boks maktabi sportchi-yoshlari erishayotgan yutuqlar quvonarli.

Mazkur boks maktabida mashgʻulotlarning uzviyligini taʼminlash, iqtidorli bolalar va oʻsmir-yoshlarni turli musobaqalarga tayyorlashda boks sporti boʻyicha trener Nizomiddin Qipchoqboyevning oʻziga xos tajribasi va shaxsiy tashabbusi yangi-yangi muvaffaqqiyatlar garovi boʻlmoqda. 2014-yildan beri “Toʻlqin” boks maktabida trenerlik qilib kelayotgan Nizomiddin Qipchoqboyevning shogirdlari orasida nafaqat Qoraqalpogʻiston, balki Oʻzbekiston chempionlari, xalqaro musobaqalarning sovrindorlari bor. Sherzod Qodirboyev 2017-yilda Oʻzbekiston chempionligini qoʻlga kiritgan boʻlsa, shu yili Filippinda boʻlib oʻtgan Osiyo chempionatida mamlakatimiz sharafini muvaffaqiyatli himoya qilib, musobaqa shohsupasining uchinchi pogʻonasidan joy oldi va bronza medal sohibi boʻldi. 33-maktab oʻquvchisi Begzod Xolboyev yaqinda boks sporti boʻyicha boʻlib oʻtgan Qoraqalpogʻiston Respublikasi chempionatida barcha raqiblaridan ustun keldi va 1-oʻrinni egalladi.

– Boks maktabimiz mashgʻulotlarida asosan 33-,32-, 8-,18-,28-,11-, va 7-sonli maktablarning boks sportiga qiziquvchi yoshlari ishtirok etadilar, – deydi trener Nizomiddin Qipchoqboyev. – Shugʻullanuvchilar safi 200 nafarga yetdi. Sharoitlarimiz yomon emas. Bolalar bilan shugʻullanishda uzviylikni taʼminlash maqsadida tinimsiz ishlashga toʻgʻri keladi.

Nizomiddin har kuni 10-12 soatlab shogirdlari bilan shugʻullanishdan charchamaydi. Uning orzusi tumanimizning chekka qishlogʻidagi “Toʻlqin” boks maktabi sportchilari orasidan jahon chempionlari yetishib chiqishiga erishish. Sportchi bolalar va oʻsmir-yoshlar orasida esa iqtidorlilar koʻp. Barchasi harakatchan, epchil, eng muhimi, jismonan sogʻlom.

Suratda: Qoraqalpogʻiston Respublikasi chempioni, 33-sonli maktab oʻquvchisi Begzod Xolboyev.

Robiya Yoʻldosheva.