SARHISOB VA YaNGI REJALAR

2019-yil 21-fevral kuni tuman xokimligining kichik majlislar zalida OʻzMTDP Amudaryo tuman Kengashining navbatdagi XI plenumi boʻlib oʻtdi. Plenumda OʻzMTDP Amudaryo tuman Kengashi xodimlari, Qoraqalpogʻiston Respublikasi Joʻqorgʻi Kengesi va Xalq deputatlari tuman Kengashi deputatlari, OʻzMDTP Qoraqalpogʻiston Respublikasi Kengashi yetakchi mutaxassisi X.Kabulov, partiya yetakchilari va faollari hamda ommaviy axborot vositalari xodimlari ishtirok etdilar.

Plenumni tuman xotin-qizlar qoʻmitasi raisi, Qoraqalpogʻiston Respublikasi Joʻqorgʻi Kengesi deputati Maryam Axmedova ochdi va olib bordi.

Plenumda Oʻzbekiston “Milliy tiklanish” demokratik partiyasi Amudaryo tuman Kengashi va partiya deputatlik guruhining 2018-yildagi faoliyati yakunlari va 2019-yildagi faoliyatining asosiy yoʻnalishlari toʻgʻrisidagi masalalar koʻrildi.

Kun tartibidagi birinchi masala yuzasidan OʻzMTDP Amudaryo tuman Kengashi raisi Shirin Yangiboyeva maʼruza qildi. U hozirgi kunda partiyaning tuman Kengashi aʼzolari soni 1401 nafarga yetgani, xisobot davrida 91 nafar aʼzo yangidan qoʻshilgani, shuningdek partiya aʼzolarining 54.6 foizini xotin-qizlar, 35.4 foizini yoshlar va qolgan 20 foizini keksalar tashkil etishini, boshlangʻich partiya tashkilotlari soni esa 41 tadan 43 taga yetganini, aʼzolik badallari tushumi boʻyicha reja 122 foizga bajarilganini mamnuniyat bilan taʼkidladi.

Shuningdek, kun tartibidagi ikkinchi masala yuzasidan Xalq deputatlari tuman Kengashi deputati A.Yusupov 2018-yil davomida Oʻzbekiston “Milliy tiklanish” demokratik partiyasining Xalq deputatlari tuman Kengashidagi deputatlik guruhi ish rejasiga muvofiq Halq deputatlari tuman Kengashi OʻzMTDP deputatlik guruhi aʼzolarining har oy davomidagi deputatlik ish faoliyati yakunlari boʻyicha hisobotlarini tinglash va kelgusi oydagi vazifalarini belgilash yuzasidan olib borilgan ishlar, hisobotlarning samarali yakunlari, deputatlik guruhi tomonidan amalga oshirilgan ishlar haqida batafsil toʻxtaldi. U oʻz maʼruzasida OʻzMTDP deputatlik guruhi aʼzolarining takliflari asosida Halq deputatlari Amudaryo tuman Kengashi sessiyasiga 6 ta masala kiritilganini taʼkidladi.

Shuningdek, A.Yusupov Xalq deputatlari tuman Kengashi deputatlari har oyda belgilangan muddatlarda partiya deputatlik guruhi ish rejasi hamda deputatlarning shaxsiy ish rejasiga muvofiq deputatlar oʻz saylovchilari bilan oʻtkazgan uchrashuvlarda fuqarolarning murojaatlari boʻyicha hududlardagi mavjud muammolar, yaʼni tabiiy gaz, elektr energiyasi, toza ichimlik suvi, yoʻl qurilishi, aholi yashash joylarini tozalash va obodonlashtirish, aholi bandligini taʼminlash, kredit olish kabi masalalar bilan bir qatorda hukumatimiz tomonidan joriy etilgan qonunlar, qarorlar va boshqa normativ huquqiy hujjatlar ijrosi nazoratiga oid masalalarda 31ta deputatlik soʻrovlari kiritilgani va tegishli javoblar olinganini va 4 ta mansabdor shaxslarning hisobotlari tinglanganini qayd etdi.

Bundan tashqari, plenumda deputatlar OʻzMTDP tuman Kengashining “Yoshlar qanoti” tomonidan tashkil etilgan “uyma-uy”, “deputat bilan yuzma-yuz” loyihalari doirasida aholi bilan uchrashib, ularning muammo va murojaatlariga yechim topishda koʻmakdosh boʻlayotganlariga alohida eʼtibor qaratildi.

Plenumda partiyaning “Xizmat-beminnat” loyihasi doirasida beminnat xizmat koʻrsatgan oʻqituvchilarga hamda partiya faoliyatida samarali ish yuritgan deputatlar, partiya aʼzolariga yuqori tashkilotlarning faxriy yorliqlari topshirildi.

Plenum soʻngida, partiya safiga yangidan aʼzolar qabul qilindi hamda kun tartibidagi masalalar toʻliq koʻrib chiqilib, tegishli qarorlar qabul qilindi.

Robiya Yoʻldosheva.