GIMNASTIKAChI QIZLAR YuTUQLARI

Sport insonni har tomonlama chiniqtiradi. Yoshlikdan sport bilan shugʻullanish bolani mustaqil boʻlishga undabgina qolmay, oʻziga ishonchini oshirib, qatʼiyat va mardlik xususiyatlarining shakllanishi, gʻalabaga intilishi, mustahkam irodaga ega boʻlishi uchun puxta zamin yaratadi. Gimnastikaning barcha turlari insonda mana shunday xususiyatlarning mustahkamlanishida muhim oʻrin tutadi. Mazkur sport turi bilan shugʻullanish nafaqat insonning jismoniy goʻzalligini shakllantiradi, balki uning feʼl-atvori, eng yaxshi fazilatlarini rivojlantiradi, irodasini chiniqtiradi, oldiga qoʻygan maqsadiga erishishga intilishini kuchaytiradi.

Tumanimizdagi Bolalar-oʻsmirlar sport maktabida ham ushbu sport turi bilan shugʻullanish uchun yetarli sharoit yaratilgan boʻlib, ularda yoshlar gimnastika bilan muntazam shugʻullanishmoqda. Maktabdagi badiiy gimnastika guruhida bugungi kunda 114 nafarga yaqin 6 yoshdan 16 yoshgacha boʻlgan sportchi qizlarga 4 nafar malakali murabbiylar saboq berib kelishmoqda. Mahoratli murabbiylardan gimnastika sirlarini oʻrganayotgan sportchi qizlar turli musobaqalarda ishtirok etib, sovrinli oʻrinlarga ega boʻlishmoqda. Natijada sportning aynan shu turi bilan shugʻullanish istagida boʻlgan qizlar sport maktabiga yanada koʻproq tashrif buyurib, ularning saflari tobora kengaymoqda.

Sport maktabining badiiy gimnastika guruhidagi mohir sportchilar Mahliyo Toirova, Sarvinoz Ermakova, Asaloy Arabovalarni ham ota-onalari kichik yoshdan shugʻullanishga olib kelishdi. Gimnastika zalida ularga dastlab chaqqonlik, nafosat, qomatni tik tutish, toʻgʻri qadam tashlash kabi mashqlarni bajarish oʻrgatildi. Keyinchalik esa argʻamchi, tasma, toʻp, xalqa kabi jihozlardan foydalanishni, ishlatishni oʻrganishdi. Shu bilan birga oilada ham ularga alohida eʼtibor qaratilib, mashqlarni takrorlab turishlariga, oʻrganganlarini mustahkamlab borishlariga imkoniyat yaratib berildi. Natijada bu mahoratli gimnastikachi qizlar turli musobaqalarda faol ishtirok etib, yutuqlarga erishishdi va nafaqat tumanimiz, balki butun Respublikaning faxriga aylanishga ulgurdi.

Yaqinda Toshkent shahrida badiiy gimnastika boʻyicha 9-12 yoshdagi qizlar oʻrtasida mamlakat miqyosida eng iqtidorlilarni aniqlash maqsadida oʻtkazilgan “Qish ertagi” turnirida sport maktabimizning badiiy gimnastika guruhi tarbiyalanuvchilari ham ishtirok etishib, gʻolib boʻlib qaytishdi. Maktabimizda ushbu jozibador sport turini mukammal oʻzlashtirayotgan gimnastikachi qizlardan Mahliyo Toirova turnirda 10 yoshlilar oʻrtasida 1-oʻrinni, Sarvinoz Ermakova 12 yoshlilar oʻrtasida 2-oʻrinni, Asaloy Arabova 9 yoshlilar oʻrtasida 2-oʻrinni qoʻlga kiritishga muvaffaq boʻldilar. Oʻz chiqishlarini mahorat bilan ijro etgan iqtidorli sportchi qizlar oltin, kumush medallar bilan qaytdilar.

Mamlakatimizda sportni rivojlantirishga alohida eʼtibor qaratilayotgani tufayli sportning boshqa turlari qatorida badiiy gimnastika ham tobora ommalashib bormoqda. Sport maktabimizda yaratilgan imkoniyatlardan samarali foydalanayotgan va sportda yuqori choʻqqilarni zabt etishga qodir iqtidor egalari koʻp. Ular oʻzlarining ortidan yana minglab qizlarni sogʻlom turmush tarzi sari yetaklash bilan birga nufuzli musobaqalarning sovrindorlari boʻlishga ham intilishmoqda.

Maʼmura Matyoqubova, tuman BOʻSM

badiiy gimnastika guruhi murabbiysi.