XITOYLIKLAR BILAN HAMKORLIKDA ISSIQXONA TAShKIL ETILDI

Mamlakatimizda qishloq xoʻjaligi mahsulotlari ishlab chiqarish hajmini kengaytirishga qaratilayotgan eʼtibor oziq-ovqat xavfsizligini taʼminlashda muhim omil boʻlmoqda.

Shu boisdan ham qishloq xoʻjaligi korxonalarida oziq-ovqat mahsulotlarini yetishtirishga moʻljallangan qoʻshimcha tarmoqlar tashkil etilayotir va aholi tomorqa yerlaridan foydalanishning samarali usullari hayotga tatbiq etilmoqda.

Amudaryolik tadbirkor Jalgʻas Baymuradov “Mangʻit invest plyus” MChJ shaklidagi qoʻshma korxonasi tarkibida bir gektar joyda issiqxona qurish niyati borligini aytganida tuman hokimi Sultonboy Yoʻldashev uni qoʻllab-quvvatladi va yer maydoni ajratishda hamda boshqa masalalarda unga yaqindan yordam koʻrsatdi.

Natijada 2018-yilning mart oyida Toshyop ovuli hududida zamonaviy issiqxona qurilishi boshlandi.

Qurilish uchun ishlatiladigan materiallar Xitoy xalq Respublikasidan olib kelindi. Xitoylik mutaxassislarning va qoʻshma korxona ishchilarining gʻayrat koʻrsatib mehnat qilishlari evaziga ushbu issiqxona 2018-yilning oktyabr oyigacha toʻla qurib bitkazildi.

Shundan keyin issiqxona yer-maydonini mahalliy va mineral oʻgʻitlar bilan oziqlantirish ishlari amalga oshirilib, ekishga tayyor qilib qoʻyildi.

2019-yilning yanvar oyida Toshkent shahridan “Alamina” navli pomidor koʻchatlari olib kelinib, belgilangan qoidalarga asosan joylashtirildi va parvarishi boshlandi.

Elektr energiyasi yordamida isitishga moʻljallangan ushbu issiqxonada qish oylarida ham moʻʼtadil harorat boʻlishi natijasida pomidor koʻchatlari durkun rivojlanib, barvaqt meva tugdi.

– Hozirgi kunda issiqxonamizda pomidor oʻsimligini tomchilatib sugʻorishga va ularni bargdan oziqlantirishga koʻproq eʼtibor berayapmiz, – deydi issiqxonada faoliyat koʻrsatayotgan agronom Bahrom Sidiqov. – Bu usul pomidor hosildorligining oshishida katta ahamiyat kasb etadi.

477 ming AQSh dollari hisobiga bunyod etilgan, tumanda yagona hisoblangan ushbu issiqxonaning tashqi va ichki koʻrinishi, ayniqsa, mehr bilan parvarishlananayotgan pomidor ekini kishining koʻzini quvontiradi. Bu issiqxonada mehnat qilayotgan ishchilardan Nurken Oʻrazov, Dilnoza Xoʻjaboyeva va Gulbahor Dushanovalar har bir ishni sidqidildan ado etib, hamkasblariga namuna boʻlmoqdalar.

A.Jumaniyozov.