FAXRIYLARGA SIFATLI TIBBIY XIZMAT KOʻRSATILMOQDA

Tumanimizda 1941-1945-yillardagi Ikkinchi jahon urushida ishtirok etgan faxriylar salomatligi tuman Tibbiyot birlashmasi qoshidagi koʻptarmoqli poliklinika va qishloq oilaviy poliklinikalari tomonidan doimiy nazoratga olingan boʻlib, hududlarga biriktirilgan shifokorlar deyarli har kuni ularning xonadonlariga borib, ahvolidan xabardor boʻlib turishadi.

Mangʻit shahrining Navoiy nomli mahallasi, Guliston koʻchasi, 34-uyda istiqomat qiluvchi Sobir Nurullayev 1924-yilda tavallud topgan. Hozirgi kunda otaxon 95 yoshdalar. Sobir  Nurullayevga koʻptarmoqli markaziy poliklinika tomonidan sifatli tibbiy xizmat koʻrsatilmoqda. Umumiy amaliyot shifokori Raʼno Tojiboyeva hamda patronaj hamshirasi Nasiba Oʻrozboyevalar tomonidan patronaj tizimiga olinib, har kuni sogʻligi tibbiy tekshiruvdan oʻtkaziladi va aniqlangan kasalligi boʻyicha zarur dori-darmonlar bilan muntazam taʼminlanib boriladi.

Qipchoq ovulining Istiqlol koʻchasi, 12-uyda yashovchi Oʻtamurod ota Bozorboyevga esa 1-sonli Qishloq oilaviy poliklinikasi shifokori Raʼnoxon Toirova hamda patronaj hamshirasi Gulshod Yeshchonovalar biriktirilgan.

Tumanimizning “Bogʻ” mahallasi, Boʻstonliq mavzesidagi Mangʻit koʻchasi, 74-uyda istiqomat qiluvchi Yoʻldosh Ortiqovning salomatligi ham koʻptarmoqli markaziy poliklinikasi tomonidan patronaj tizimiga olingan. Otaxonning sogʻligi shifokor Muhabbat Bobojonova va patronaj hamshirasi Feruza Ollaniyozovalar tomonidan doimiy tekshiruvdan oʻtkaziladi va zarur paytda muolajalar belgilanib, markaziy poliklinika tomonidan dori-darmonlar bilan muntazam taʼminlanib borilmoqda.

Ikkinchi jahon urushi ishtirokchilari boʻlgan bu otaxonlar yaqin oʻtmish tariximizning tirik guvohlari. Ularning xalqimiz uchun qilgan buyuk xizmatlari oldida barchamiz birday qarzdormiz va salomatliklari uchun masʼulmiz. Shu bois, tumanimizda yashovchi uch nafar Ikkinchi jahon urushi faxriylari salomatligi shifokorlarimiz tomonidan qatʼiy belgilangan reja asosida patronaj tizimiga olingan va har kuni salomatligi tibbiy tekshiruvdan oʻtkaziladi. Tor doiradagi shifokorlar tomonidan chuqurlashtirilgan tibbiy koʻrikdan oʻtkazilib, tez-tez qon va peshob tahlillari tekshiriladi va zarur holatlarda qoʻshimcha muolajalar belgilanadi.

Ayni paytda tumanimizdagi uch nafar  Ikkinchi jahon urushi faxriylarining salomatligi qoniqarli, ular oʻzlarini yaxshi his qilishmoqda.

Fursatdan foydalanib, otaxonlarni va tumanimiz aholisini 9-may – Xotira va qadrlash kuni bilan chin dildan tabriklayman. Xalqimiz baxtiyor, osmonimiz musaffo, Vatanimiz hamisha tinch boʻlsin.

Shukurulla BOLTABOYeV, tuman koʻp tarmoqli poliklinikasi mudiri.