”Tashabbus-2019” koʻrik-tanlovining tuman bosqichi gʻoliblari aniqlandi

 Joriy yilning 14-aprelida Oʻzbekiston Respublikasi Prezidenti sovrini uchun tadbirkorlar, fermerlar va hunarmandlar oʻrtasida oʻtkaziladigan ”Tashabbus-2019” koʻrik-tanlovini yuqori darajada tashkil etish boʻyicha Vazirlar Mahkamasining farmoyishi qabul qilingan edi.

7-may kuni tuman hokimligi, tuman Tadbirkorlikka koʻmaklashish markazi, Tadbirkorlar va ishbilarmonlar harakati-Oʻzbekiston liberal demokratik partiyasi hamkorligida tashkillashtirilgan ushbu koʻrik-tanlovning tuman bosqichi boʻlib oʻtdi. Tumandagi Istirohat bogʻida oʻtkazilgan mazkur tanlovda 30 nafardan ziyod tadbirkorlar, fermerlar va hunarmandlar ishtirok etdilar. Unda oʻziga xos uslubda yaratilgan mahsulotlari bilan qatnashgan ishtirokchilarning faoliyati, ishlab chiqarish va xizmat koʻrsatish salohiyati, iqtisodiy holati belgilangan mezonlar boʻyicha xolisona baholandi va munosib nomzodlar aniqlandi.

Koʻrik-tanlovning tuman bosqichida “Eng yaxshi hunarmand” nominatsiyasi boʻyicha “Amu dizayn” oilaviy korxonasi, “Eng yaxshi fermer” nominatsiyasi boʻyicha “Erkin Rasulov” asalarichilik fermer xoʻjaligi, sanoat yoʻnalishidagi “Eng yaxshi tadbirkor” nominatsiyasi boʻyicha “Amu Shaxjaxon” maʼsuliyati cheklangan jamiyati, xizmat koʻrsatish yoʻnalishida “Eng yaxshi tadbirkor” nominatsiyasi boʻyicha “Qoʻshayev Raym” xususiy korxonasi, “Eng yaxshi yosh tadbirkor” nominatsiyasi boʻyicha “Tamara-Feruza” xususiy korxonasi gʻolib deb topildi. 

Gʻoliblarga maxsus diplom va qimmatbaho sovgʻalar topshirildi.

M. Beknazarova, O'zLiDeP tuman Kengashi apparat rahbari.