Sogʻlom bola yili yangiliklari

Qunduzoy - "Kamalak yulduzlari"dan biri

Mamlakatimizda oʻsib kelayotgan yosh avlodning qiziqishlariga monand ravishda ularning qobiliyatlarini rivojlantirish va davlat tomonidan ragʻbatlantirishga alohida eʼtibor beriladi. Bu borada "Kamolot" YoIH Markaziy Kengashi va Oʻzbekiston Respublikasi Xalq taʼlimi Vazirligi tomonidan oʻtkazilib kelinayotgan "Kamalak yulduzlari" bolalar ijodiyoti festivali ham muhim ahamiyatga ega.

Tumanimizdagi 16-sonli ixtisoslashgan maktab-ning 7-sinf oʻquvchisi Qunduzoy Yusupova mazkur tanlovning tuman va Respublika bosqichlarida muvaffaqiyatli qatnashib, "Kamalak yulduzlari" bolalar ijodiyoti festivalining eng faol ishtirokchisi sifatida "Kamolot" YoIH Markaziy Kengashi hamda Oʻzbekiston Respublikasi Xalq taʼlimi Vazirligi tomonidan maxsus sertifikat hamda Faxriy yorliqlar bilan taqdirlandi.

Huquqbuzarliklarning oldi olinmoqda

"Toshyop" ovul fuqarolar yigʻinida faoliyat yuritayotgan Jinoyatchilik profilaktikasi sektori aʼzolari ovul hududida jinoyatchilikning, tartib buzilishlarining oldini olish borasida belgilangan reja asosida tizimli ish olib bormoqdalar. Xususan, oʻtgan oy davomida sektor aʼzolari chetga ishga ketgan 8 nafar fuqaro, kasb-hunar kollejiga oʻqishga muntazam qatnashmayotgan 3 nafar oʻquvchi hamda jazo muddatini oʻtab kelgan 2 nafar shaxslarning oilalarida boʻlib, kerakli tushuntirish-targʻibot ishlarini olib bordilar.

Yangi uslubiy qoʻllanma nashr qilindi

Oʻzbek tili va adabiyoti fanini chuqur oʻrganishni oʻz oldiga maqsad qilib qoʻygan odam eng avvalo oʻzbek tili grammatikasini yaxshi bilishi zarur. Tumanimizdagi 40-sonli umumtaʼlim maktabining ona tili va adabiyoti fani oʻqituvchisi Hulkaroy Xoʻjaniyozovaning 2013-yilda "Bilim" nashriyotida chop etilgan "Diktantlar toʻplami" ham ana shu maqsadga xizmat qilishga moʻljallangan.

Mazkur toʻplam oʻqituvchilarning oʻzbek tili grammatikasining boy imkoniyatlaridan unumli foydalangan holda dars oʻtishlarida haqiqiy uslubiy qoʻllanma hisoblanadi. Qoʻllanmada oʻquvchilarning yozma va ogʻzaki nutqlaridagi imloviy xatolarni bartaraf etish usullari, 5-va 9-sinflar uchun ogʻzaki va yozma nutqni rivojlantirishga moʻljallangan diktantlar mavzulari, kirish soʻz va kirish birikmalarda  tinish belgilari hamda undalmalarda  vergullarning ishlatilishiga oid muallifning uslubiy tajribalari oʻz aksini topgan.