ORASTALIK VA OZODALIK KUNDALIK TURMUSh TARZIMIZGA AYLANSIN!

Ozodalik va poklikka intilish, atrof-muhitning fayzli, obod va sarishtaligini taʼminlash xalqimizga xos fazilatlardan. Bugun yurtimizning qaysi burchagiga bormang, yurtdoshlarimiz turmush tarzida bunyodkorlik va yaratuvchanlikka, ozodalik va obodlikka intilish ishtiyoqi sezilib turadi. Oʻzbekiston Respublikasi Vazirlar Mahkamasining 2013-yil 3 dekabrdagi «Respublika aholi punktlarida sanitariya jihatidan tozalash tizimini rivojlantirish va takomillashtirish chora-tadbirlari toʻgʻrisida»gi qarori ham xalqimizning ana shu ezgu intilishlarini ifoda etgan muhim hujjat boʻldi.

Aholi turmush darajasi va sifatini oshirish chora-tadbirlari kompleksini bajarish, joylarda sanitariya va ekologik vaziyatni tubdan yaxshilash, aholining qattiq maishiy chiqindilarini tashib ketish va joylashtirish boʻyicha sanitariya jihatidan tozalash borasida oʻz vaqtida va sifatli xizmatlarni samarali tashkil etish maqsadida qabul qilingan ushbu qaror asosida tumanimizda ham qator ijobiy ishlar qilinmoqda.

Tuman obodonlashtirish boshqarmasi tasarrufidagi 8 ta zamonaviy maxsus avtotransport vositalari, jumladan 1 dona chiqindi yuklovchi traktor, 1 ta suv sepish, 1 ta axlat tashish, 1 ta ichimlik suvi tashish mashinalari, 1 dona kran-manipulyator kabi texnikalar hamda 3 ta traktor tirkamalari yordamida tozalash va obodonlashtirish ishlari samarali olib borilmokda.Shuningdek, boshqarmada xizmat bobida foydalanish uchun 1 ta "Damas” avtomashinasi mavjud.

Vazirlar Mahkamasining yuqoridagi qarorini ijro qilish boʻyicha shaharlar va aholi punktlarining tashqi qiyofasiga boʻlgan zamonaviy shaharsozlik talablarini hisobga olgan holda, qattiq maishiy chiqindilarni tashib ketish va ularni sanitariya qoidalari va normalariga qatʼiy muvofiq holda joylashtirish ishlarining tashkil etilishini taʼminlash maqsadida tuman markazi, shahar tipidagi posyolkalar va qishloq aholi punktlarida yashovchi aholiga xizmat koʻrsatish uchun "Oʻrta qalʼa” ovuli tarkibidagi "Bogʻ” mahallasi hududida yangi tashkil etiladigan 1 ta poligon - qattiq chiqindilar maydonchasi uchun 10 gektar yer uchastkasi ajratildi.

Endilikda mazkur uchastkaning atrofini oʻrash ishlari amalga oshiriladi va qattiq maishiy chiqindilarni toʻplash, turlarga ajratish, tashish, poligonlarda koʻmib tashlashda sanitariya jihatidan tozalash obʼektlaridan foydalanish va saqlash hamda ularni sanitariya va ekologiya talablariga muvofiq utilizatsiya qilish ishlari tashkil etiladi.

Vazirlar Mahkamasining yuqoridagi qarori bilan "Qattiq maishiy chiqindilarni tashib ketish va koʻmib tashlashni tashkil etish va nazorat qilish modeli”, shuningdek shaharlarda, tuman markazlarida va shahar tipidagi posyolkalarda hamda qishloq aholi punktlarida axlatlarni toʻplash shoxobchasining namunaviy maketi ishlab chiqilib, tasdiqlandi. Shuningdek, qattiq maishiy chiqindilarni tashib ketish xizmatlaridan amalda foydalanuvchi aholi sonini hisobga olgan holda axlat toʻplash shoxobchalari va konteynerlar soni hamda ularni joylashtirish sxemalari ishlab chiqildi.

Unga koʻra, 2014-yilda tuman markazidagi 11 ta mahallalar hududidagi 6360 ta xonadon, shuningdek 41 ta koʻp qavatli uylardagi 554 ta xonadonlarga xizmat koʻrsatish uchun 3 ta axlat toʻplash shoxobchasini qurish va ularni 6 ta konteyner bilan jihozlash rejalashtirilmoqda. Tumanimiz ovullarida joriy yilda jami 110 ta axlat toʻplash shoxobchalari quriladi.

Bu ishlarni oʻz vaqtida va sifatli amalga oshirish maqsadida, sanitariya jihatidan tozalash boʻyicha obodonlashtirish boshqarmasining xoʻjalik hisobidagi uchastkalari va poligonlarida foydalanish uchun qoʻshimcha texnikalar - 3 ta axlat tashish mashinasi va 1 ta samosval xarid qilish boʻyicha shartnomalar imzolandi. Tuman obodonlashtirish boshqarmasi tomonidan yuqoridagi qaror talablarini bajarish boʻyicha barcha zarur choralar koʻrilib, amaliy ishlar boshlanmoqda.

Aytish joizki, tozalik va ozodalikka eʼtibor berish oʻzini shu yurt farzandi deb bilgan har bir fuqaroning burchidir. Oʻzbekiston Respublikasining «Chiqindilar toʻgʻrisida»gi qonuni 12-moddasida fuqarolarning oʻzini oʻzi boshqarish organlarining chiqindi bilan bogʻliq ishlarni amalga oshirish, obʼektlarni tegishli hududda joylashtirish masalalarini hal qilishda ishtirok etishlari, aholi punktlarining sanitariya jihatidan tozalanishiga hamda maishiy-roʻzgʻor chiqindilari toʻplab olib ketilganligi uchun toʻlovlarning vaqtida toʻlanishiga koʻmaklashishlari, obʼektlarning sanitariya va ekologik holati ustidan jamoat nazoratini amalga oshirishi boʻyicha qator vazifalari belgilab qoʻyilgan. Shularni inobatga olgan holda ovul va mahalla fuqarolar yigʻinlari xodimlari va mahalla faollarini oʻzaro hamkorlikka chorlab, qattiq maishiy chiqindilar bilan ishlash obʼektlarining sanitariya va ekologik holati yuzasidan jamoatchilik nazoratini olib borishga chaqiramiz. Zero, oʻzimiz yashayotgan va mehnat qilayotgan hududning saranjom-sarishtaligi va ozodaligi, atrof-muhit musaffoligi siz-u bizning hamkorligimizga bogʻliq.

Qishning ayozli kunlari poyoniga yetib, uygʻonish fasli tashrif buyurgan ilk kunlardan boshlab tevarak-atrofimizni obodonlashtirish va koʻkalamzorlashtirish masalasi har qachongidan-da muhim ahamiyat kasb etadi. Bu borada barchamiz bir boʻlib mehnat qilsak, orastalik va ozodalikni kundalik turmush tarzimizga aylantirsak, hayotimiz yanada goʻzal boʻladi.

Anvar KAMOLOV,

tuman obodonlashtirish boshqarmasi boshligʻi.

(Foto - kamolot.uz)