Ijtimoiy hayotda faol yoshlar uy-joy bilan taʼminlanmoqda

Respublikamizda davlat va jamoat hayotida faol ishtirok etayotgan, fan, taʼlim, madaniyat, sport, ishlab chiqarish va boshqa sohalarda yuksak natijalarga erishayotgan faol yoshlarga ularni ragʻbatlantirish, yosh oilalarni qoʻllab-quvvatlash maqsadida zamonaviy loyihalar asosida qurilgan “Yoshlar uylari”dan turar joylar berilmoqda. Bu borada Oʻzbekiston Respublikasi Vazirlar Mahkamasining 2014-yildagi “Mamlakatning ijtimoiy hayotida faol qatnashayotgan yosh oilalarni uy-joy bilan taʼminlashni yanada qoʻllab-quvvatlash chora-tadbirlari toʻgʻrisida”gi va 2017-yildagi “Mamlakat ijtimoiy hayotida faol ishtirok etayotgan yosh oilalarni uy-joy bilan taʼminlashda qoʻllab-quvvatlashga doir qoʻshimcha chora-tadbirlar toʻgʻrisida”gi qarorlariga muvofiq tizimli ishlar amalga oshirilmoqda.

Mazkur qaror asosidagi “Yoshlar uyi”ning koʻp kvartirali uylaridan yosh oilalarga kvartiralar berish masalalarini koʻrib chiqish tartibi toʻgʻrisida”gi Nizomga koʻra taqdim etilgan tegishli hujjatlar Respublika komissiyasida koʻrib chiqilib, 2015-2018-yillar mobaynida Qoraqalpogʻiston Respublikasi tumanlarida istiqomat qiluvchi 406 yosh oilaga 9 ta koʻp qavatli uylar topshirildi. Oʻtgan 2018-yil davomida Vazirlar Mahkamasining 2017-yildagi “Mamlakat ijtimoiy hayotida faol ishtirok etayotgan yosh oilalarni uy-joy bilan taʼminlashda qoʻllab-quvvatlashga doir qoʻshimcha chora-tadbirlar toʻgʻrisida”gi qarori boʻyicha respublika tavsiyanomasiga ega boʻlgan 46 nafar nomzodlarga jami 1 mlrd. 48 mln. 547,8 ming soʻm miqdoridagi dastlabki badal pullari toʻlab berilishi taʼminlandi. Jumladan, qarorga asosan 2019-yilda yosh oilalarga Respublikada tumanlar hududidan 51 ta, Nukus shahridan 45 ta xonadonlar ajratilishi rejalashtirildi.

Tumanimizda esa 2015-yilda qurilgan koʻp qavatli 48 xonadonli “Yoshlar uyi”dan 48 ta yosh oila uy bilan taʼminlandi. Shundan soʻng, 2018-yilda 3 ta yosh oilaning oʻz uylariga ega boʻlishlariga koʻmaklashildi. Qarorga koʻra, bu uylarning oldindan toʻlanadigan badal toʻlovi Yoshlar ittifoqi tomonidan toʻlab berildi. Mazkur yilda Yoshlar ittifoqi tuman Kengashi koʻmagi bilan 8 ta yosh oilani uy bilan taʼminlash rejaga kiritildi.

Namunaviy loyiha asosida qurilgan ushbu zamonaviy uylarda farovon yashash uchun barcha qulayliklar mavjud. Barcha xonadonlar gaz va elektr taʼminoti, isitish tizimi, issiq, sovuq suv bilan birga oshxona va hammomda zarur jihozlar oʻrnatilgan holda oʻz egalariga topshirildi.

Bunday uy-joylarga ega boʻlayotgan yosh oilalar davlatimiz tomonidan koʻrsatilayotgan alohida eʼtibor va gʻamxoʻrlikdan nihoyatda mamnun. Bu mamnuniyat esa oʻz navbatida yoshlar dilidagi kelajakka daxldorlik hissini, jamiyat oldidagi masʼuliyatini yanada oshiradi va ularni bundan ham koʻproq bunyodkorlik, yaratuvchanlik ishlarini amalga oshirishga daʼvat etadi.

O.Xudoyberganova.