KOʻP TARMOQLI FERMER XOʻJALIGIDA MOʻL PAXTA HOSILI YeTIShTIRILAYaPTI

Amudaryo tumanining “Qangli” ovuli hududidagi Qurbonboy  Aytimbetov rahbarlik qilayotgan “Aytimbetov Qurbonboy” koʻp tarmoqli fermer xoʻjaligi 109 gektar yer maydoniga ega boʻlib, bu xoʻjalikda paxta, boshoqli don, sabzavot va poliz mahsulotlari yetishtirish bilan birgalikda asalarchilik va baliqchilikni rivojlantirishga ham alohida eʼtibor berilayapti.

Xoʻjalik aʼzolari davlatga pilla, paxta va gʻalla topshirish boʻyicha shartnomaviy rejalarini har yili ortigʻi bilan bajarishga erishib kelmoqdalar. Shu yilning bahorida fermer xoʻjaligi mehnatkashlari 8 quti ipak qurti urugʻini yaxshi parvarish qilib, davlatimizning pilla xirmoniga 500 kilogrammga yaqin “kumush tola” topshirishga erishdilar. Fermer xoʻjaligi mehnatkashlari 8 gektar maydondagi kuzgi bugʻdoydan ham yaxshi hosil olishga erishdilar. Fermer xoʻjaligi mehnatkashlari bu yil  26 tonna bugʻdoy yetishtirib, hosildorlikni 32 tsentnerga yetkazishga muvaffaq boʻldilar.

Hozirgi kunda fermer xoʻjaligining 51 gektar maydonidagi gʻoʻzalar agrotexnik qoidalar asosida parvarish qilinayapti. Shu kungacha gʻoʻza qator oralariga 2 ta  TTZ-80 rusumli traktor va boshqada mexanizmlar yordamida bir necha marotaba ishlov berildi. Xoʻjalikda gʻoʻzalarni sugʻorish, oziqlantirish va begona oʻtlardan tozalash ishlari ham shu kunning talablari darajasida amalga oshirilayapti.

Ayni kunda fermer xoʻjaligi dalalarida yaxshi parvarish qilinayotgan har bir tup gʻoʻzada hosil nishonalari – gul va koʻsaklar koʻpaymoqda.

Bu yil fermer xoʻjaligi mehnatkashlari davlat xirmoniga 104 tonna paxta topshirib, shartnomaviy rejalarini muvaffaqiyatli bajarishni niyat qilishmoqda.

A.JUMANIYoZOV.