QANGLI OVULI OBOD GOʻShAGA AYLANMOQDA

Mustaqillik yillarida aholi turmush sharoitini yaxshilash, fuqarolarning oʻz hayotlaridan rozi boʻlib yashashlariga erishish, ovul, mahallalarda uyma-uy yurish orqali turmushlaridagi muammo va kamchiliklarni aniqlab, bartaraf etish, intilishlarini qoʻllab-quvvatlashga qaratilayotgan eʼtibor mamlakatimizning chekka-chekka hududlarida ham oʻz aksini topmoqda.

Turkmaniston davlati bilan chegara hududda joylashgan Qangli ovulida 3345 nafar aholi istiqomat qiladi. Shuning 3127 nafari oʻzbek, 89 nafari qozoq, 30 nafari qoraqalpoq, 96 nafari turkman, shuningdek, tatar, qirgʻiz millatiga mansub aholi istiqomat qiladi.

Azal-azaldan shu hududda yashab kelayotgan turli millat vakillarining toʻyi, maʼrakasi, quvonchi-shodligi bir, bir oila farzandlariday ahil, inoq  yashab kelishmoqda.

Ovuldagi mehnatga yaroqli 1730 nafar aholining 1169 nafari iqtisodiyot tarmoqlarida, 18 nafari kichik korxonalarda, 181 nafari taʼlim muassasalarida, 60 nafari sogʻliqni saqlash muassasalarida, 4 nafari madaniyat muassasalarida mehnat qilishadi. Shuningdek, 45 nafar odam qurilish sohasida ishlaydi, uy mehnatida band boʻlganlar soni esa 75 nafarni tashkil etadi.

Mehnatga layoqatli, vaqtincha ishsiz 568 nafar aholini ish bilan taʼminlash, oilalarida daromad manbalarini yaratishlariga erishish maqsadida tushuntirish-targʻibot ishlari olib borilayapti.

Ovul aholisining 106 gektarlik tomorqa yer maydoni oilalar iqtisodi yuksalishiga sezilarli taʼsir koʻrsatayotgan manbadir. Ular turli qishloq xoʻjalik ekinlarini barvaqt yetishtirib, oʻz oilasi ehtiyojidan ortganini bozorga olib chiqib sotib, elimiz dasturxoni toʻkinligiga ham munosib hissa qoʻshishayotir.

Shuningdek, aholining 1618 bosh qoramoli, 76 bosh qoʻy-echkilari, 6500dan ziyod parrandalari ham daromadlari koʻpayishiga, turmushi farovonlashuviga asos boʻlayotir. Shundandir, 138 nafar aholi oʻz shaxsiy texnika vositalariga ega, bir-biridan fayzli koʻchalardagi deyarli barcha uy-joylar zamonaviy uslubda taʼmirlangan obodonlashtirilgan, koʻkalamzorlashtirilgan.

Ovul hududida 67- va 29-sonli maktablar, 44-sonli maktabgacha taʼlim muassasasida aholi farzandlari taʼlim-tarbiya olishadi. Shuningdek, Qangli MMTP, Qangli QVP, Qangli madaniyat uyi, Xonjigʻali biolaboratoriyasi, Quyi Qipchoq SIU va 18 ta fermer xoʻjaliklari faoliyat yuritadi.

Bugungi kunda ovul aholisiga 1 ta “Amudaryotutinuv” aktsiyadorlik jamiyatiga qarashli, 9 ta xususiy doʻkonlar, 1 ta goʻsht sotiladigan doʻkon, 3 ta stadionlar, 3 ta sport maydonchalari, 8 ta maishiy xizmat koʻrsatish shohobchalari, shundan 5 ta tikuvchilik tsexi, 3 ta xarazlar xizmat koʻrsatmoqda.

Maktabgacha taʼlim muassasalarida taʼlim-tarbiya ishlarining yaxshi yoʻlga qoʻyilganligi, aholi orasida sogʻlom turmush tarzi keng targʻib qilinganligi qoʻshni-qoʻshnilar, qarindoshlar orasida oʻzaro mehr-oqibat barqarorligiga erishilgan. Natijada tufayli ovul hayoti tinch-osoyishta. Hudud joriy yil boshidan beri tumanimizning jinoyatchilikdan holi hududlaridan hisoblanadi.

Ovuldagi taʼlim-tarbiya muassasalarida oʻquvchi yoshlarning zamonaviy ilmlarni puxta egallashlariga eʼtibor berilayotganligi va ishsiz yoshlar orasida sogʻlom turmush kechirish ahamiyati keng targʻib etilayotganligi oʻz samarasini berayapti.

Mamlakatimiz mustaqilligining 28 yilligini munosib kutib olish va nishonlashga qangliliklar ham oʻzgacha shijoat bilan kirishayapti. Koʻchalar, hovli-joylar atroflari obodonlashtirilib, oʻzgacha chiroy ochmoqda. Ha, Qangli ovuli aholisi mehnatlari bilan oʻz hududini obod va farovon goʻshaga aylantirmoqdalar.

Oygul PAJABOVA.