Respublika miqyosida tanilgan bolalar markazi

Vazirlar mahkamasining 2011-yil 28-fevralda qabul qilingan "Maktabdan tashqari taʼlim tizimini yanada takomillashtirish chora-tadbirlari toʻgʻrisida”gi 50-sonli qarori asosida Respublikamizda "Barkamol avlod” bolalar markazlari tashkil etildi hamda "Barkamol avlod” bolalar markazlari toʻgʻrisida Nizom ishlab chiqildi.

Tumanimizda tashkil qilingan "Barkamol avlod” bolalar markazi ham hozirgi kunda oʻquvchi-yoshlarga turli kasb sirlarini oʻrgatish, boʻsh vaqtlarini mazmunli oʻtkazish va qiziqishlariga qarab maktabda olgan bilimlarini rivojlantirish, amaliyotda mustahkamlash maqsadida 3 ta yoʻnalish - "Badiiy ijodiyot”, "Texnik ijodiyot”, "Oʻlkashunoslik va ekologiya” yoʻnalishlari boʻyicha oʻz faoliyatini yuritib kelmoqda.

Quvonarlisi shuki, ilk marotaba tumanimizda Mustaqilligimizning 22-yilligiga bagʻishlab oʻtkazilgan bayram tadbirida markazimizning "Folklor” toʻgaragi aʼzolari Sanʼatbek Olloyorov va Diyorbek Ortiqovlar oʻzlarining "Oʻzbekiston” qoʻshigʻi bilan qatnashdilar. "Barkamol avlod” bolalar markazlari reytingi jamoa aʼzolarining koʻrik-tanlovlardagi ishtiroki, har xil tadbirlar oʻtkazish bilan belgilanadi. Shu boisdan tadbirlar faoliyatimizning asosiy mezoni hisoblanadi. 2013-yilning noyabr oyida Nukus shahrida boʻlib oʻtgan koʻrik-tanlovda ham markazimiz oʻquvchilari faol ishtirok etib, faxrli oʻrinlarni qoʻlga kiritdilar. "Badiiy nafosat bilimdoni” deb nomlangan koʻrik-tanlovning Respublika bosqichida "Qoʻgʻirchoq teatri” yoʻnalishi boʻyicha markazimizning "Jayhun” jamoasi 2-oʻrinni, "Bolalar va suv” Respublika bolalar festivalida esa "Amu yulduzlari” jamoasi 2-oʻrinni egalladilar. Eng quvonarlisi, "Ulugʻbek yulduzlari” koʻrik-tanlovida "Raketa modellashtirish” yoʻnalishi boʻyicha 40-sonli maktabning 5-sinf oʻquvchisi Komronbek Baxtiyorov va 31-sonli maktabning 8-sinf oʻquvchisi Azizbek Nurjonovlar Qoraqalpogʻiston  Respublikasida 1-oʻrinni egalladilar va Toshkent shahrida, 2013-yilning 28-29-noyabr kunlari boʻlib oʻtgan final bosqichida esa Komronbek Baxtiyorov 2-oʻrinni, Azizbek Nurjonov 3-oʻrinni egallab qaytdilar.

Qilingan ishlar oʻz samarasini berayotgani bizni quvontiradi. 2013-yilning 11-dekabr kuni Toshkent shahrida xalq taʼlimi Vazirligi tomonidan oʻtkazilgan yil yakunlariga bagʻishlangan yigʻilishda bolalarni jalb qilish boʻyicha Respublikamizdagi beshta tumandagi markazlar eʼtirof etilib, bulardan biri bizning markazimiz boʻlganligi bizni yanada ilhomlantirdi.

Prezidentimiz I.Karimov tashabbusi bilan 2014-yilning "Sogʻlom bola yili” deb eʼlon qilinishi bizlarning zimmamizga masʼuliyatli vazifalar yuklaydi, albatta. Farzandlarimizni har tomonlama sogʻlom, barkamol avlod qilib tarbiyalashda oʻz oldimizga qoʻygan maqsadlarni amalga oshirishimizga yaqindan yordam berayotgan va farzandlarini toʻgaraklarga ishonib topshirayotgan ota-onalarga oʻz minnatdorchiligimizni bildiramiz. Yurtboshimiz Oʻzbekiston Respublikasi Konstitutsiyasi qabul qilingan kunning 21-yilligiga  bagʻishlangan yigʻilishdagi maʼruzasida taʼkidlaganlaridek: "maʼnaviy jihatdan sogʻlom, hech kimdan kam boʻlmasdan, boshini baland koʻtarib yashaydigan, Vatanimizning taqdiri va kelajagi uchun masʼuliyatni oʻz zimmasiga olishga, xalqimiz intilayotgan kelajagi buyuk davlat barpo etishga qodir boʻlgan barkamol avlodimiz”ni tarbiyalash borasida oʻz farzandlarining qiziqishlari va qobiliyatlariga eʼtiborli boʻlgan barcha ota-onalar bilan hamkorlikda ish olib boraveramiz. Zero, bugungi yosh avlodning barkamolligi uchun barchamiz birday masʼulmiz.

Shokir XUDOYBERGANOV,