Virusli gepatit A kasalligi zararli oqibatlarni keltirib chiqaradi

Xalq orasida “sariq kasalligi” nomi bilan yuritiladigan virusli gepatit “A” kasalligi jigarning jarohatlanishi bilan kechadigan yuqumli kasallikdir.

  Kasallik  asosan kasallikka chalingan bemorlardan  va iflos qoʻl bilan ovqatlanishdan, meva-sabzavotlarni yuvmasdan isteʼmol qilinganda, suv qaynatmay ichilganda, isteʼmolga tayyor oziq-ovqat mahsulotlarga pashshalarning oʻtirishi oqibatida yuqishi mumkin.

  Kasallikning belgilari tana harorati koʻtarilishi, holsizlik, qorinda ogʻriq, ishtahasizlik, koʻngil aynishi, qusish, peshob rangining oʻzgarishi, oʻng qovurgʻa ostida ogʻriq boʻlishi va teri rangining sariq tusga kirishida ifodalanadi.

Shu bilan birga yuqumli sariq kasalligiga chalingan bolalarda uzoq muddat jismoniy harakatdan cheklanish, parhezga rioya qilish, jigar faoliyatini qayta tiklash uchun koʻplab dori vositalarini qabul qilish, umuman bemor toʻliq tuzalmaguncha unga alohida eʼtibor hamda parvarish talab etiladi. Natijada, oila aʼzolari bundan moddiy va maʼnaviy zarar koʻradi, ota-ona farzandining xastaligini koʻrib turib har soniyada aziyat chekadi.

 Kasallik yuqmasligi uchun bolalarni shaxsiy gigiyena qoidalariga rioya etishga oʻrgatish, qoʻllarni sovunlab yuvishga odatlantirish, meva-sabzovotlarni yuvib isteʼmol qilishga oʻrgatish, bolalarda barmoqlar, oʻyinchoqlar va boshqa turli buyumlarni ogʻizga solish, qoʻllarni soʻrish, tirnoqlarni tishlash kabi odatlar shakllanishga yoʻl qoʻymaslik kerak. Undan tashqari, suvni qaynatilgan holda ichish, bemorlarning idish-tovoqlari, oʻyinchoqlari va boshqa maishiy buyumlarini zararsizlantiruvchi vositalar yordamida muntazam ravishda yuvib turish,  hojatxonalarni zararsizlantiruvchi vositalar yordamida muntazam artib turish ham tavsiya etiladi.

Shu bilan birga mutaxassis shifokorlar tavsiyasiga koʻra, kasallikning oldini olishda eng samarali himoya vositasi – emlash hisoblanadi.

Gulshod Tajiboyeva, tuman DSENM

epidemiologiya boʻlimi mudiri.