TOʻY LIBOSI – MAʼNAVIYaTIMIZ ZIYNATI

Oʻzbek xalqi sharq xalqlari orasida oʻzining boy milliy urf-odatlari, anʼanalari, asrlar osha oʻz ziynatini, salobatini yoʻqotmay, bugungi kungacha yetib kelgan milliy marosimlari bilan boshqa xalqlardan ajralib turadi. Mana shunday milliy marosimlarimizdan biri bu – toʻy marosimidir. Oʻzbek oilalarida bu marosim keng shodiyona sifatida nishonlanadi. Men bu oʻrinda, toʻy marosimi haqida emas, balki mana shu marosimning sababchilari boʻlmish, kelin va kuyovning toʻy kuni kiyadigan toʻy liboslari haqida gapirmoqchiman.

Bugungi kunda, mamlakatimizga Yevropa madaniyati kirib kelishi bilan kelin-kuyovlarimizning kiyadigan toʻy liboslari ham tubdan oʻzgarib ketdi. Yaʼni, bir kunlik toʻy uchun falon ming soʻmlik kelin koʻylagi, kuyov uchun dabdabali kostyum-shim - bularning hammasi peshona teri evaziga topgan pulimizni havoga sovurish bilan barobar. Ayniqsa, kelinlarimiz qimmatbaho, bashang kelin koʻylaklarini kiyib, davrada oʻzini malikalardek his qilib oʻtirishni yoqtirishadi. Toʻgʻri, oppoq toʻy libosini kiyish har bir qiz bolaning yuragidagi yagona orzu. Lekin qimmatbaho kelin koʻylagi-yu, qimmatbaho soch turmagi va boshqa zeb-ziynatlar koʻpincha qiz bolaning haqiqiy goʻzalligini yashirib qoʻyadi. Zero, bu narsalarning barchasi baxt olib kela olmaydi. Haqiqiy goʻzallik esa bu – qiz bolaning qalb goʻzalligi, odobi va epliligi hisoblanadi.

Yuqorida aytib oʻtilgan soxta goʻzallikni biz pulga sotib olmaylik, buning oʻrniga bu pullarni foydali ishlarga, foydali narsalarga sarf qilaylik. Kelin koʻylagi oʻrniga esa oʻzimizning milliy shoyi-atlas, adraslarimizni kiyaylik. Momolarimiz kiygan bu matolar kelin qizning husniga-husn, nazokatiga-nazokat qoʻshib turadi.

Oʻzbek qizini qadimdan momolarimiz oʻn toʻrt kunlik toʻlin oyga qiyoslashgan. Biz, "oʻn toʻrt kunlik oy” nomini oqlab ish tutaylik. Yuzimizni yuvishimiz bilan asar ham qolmaydigan yuqoridagi kabi soxta goʻzallikni emas, balki, butun umr bizga ziynat boʻla oladigan qalb goʻzalligini qalbimizga jo etaylik. Ana shundagina biz mustahkam oila va obod turmushni bunyod eta olamiz.

Aziza MADRAHIMOVA,

Mangʻit iqtisodiyot kasb-hunar kolleji talabasi. 

(Foto - http://kelin-kuyov.uz)