NAVOIY VA BOBUR MAʼNAVIY MEROSI – QALBLAR ZIYNATI

Birinchi Prezidentimiz Islom Karimov “Yuksak maʼnaviyat – yengilmas kuch” kitobida taʼkidlaganidek:  “maʼnaviyat – insonni ruhan poklanish,  qalban ulgʻayishga chorlaydigan,  odamning ichki dunyosi,  irodasini baquvvat,  iymon-eʼtiqodini butun qiladigan,  vijdonini uygʻotadigan beqiyos kuch,  uning barcha qarashlarining mezonidir”. Bu fazilat insonda oʻzini anglashi, ajdodlari merosini oʻrganishi va oʻqishi bilangina shakllanadi.  

Shu kunlarda mamlakatimizda ulugʻ mutafakkir ajdodlarimiz Alisher Navoiyning 579-yilligi va Zahiriddin Muhammad Boburning 537-yilligi keng nishonlanayotganida ham ushbu fikr yana bir bor oʻz isbotini topmoqda.

Ulugʻ allomalar oramizda bir umr yashaydilar.  Qiyofalari tasavvurlarda, dillarda,  nomlari esa tillarda mangu qoladi.  Atrofga qarasangiz bobolarimiz nomiga havas qilib, ularga oʻxshashini istab qoʻyilgan Alisher,  Bobur ismlik insonlar behisob.  Mamlakatimizda shahar-u  ilm dargohlari,  koʻchalar,  xiyobonlar,  teatr,  metro bekatlari ham bobolarimiz Mir Alisher Navoiy va Mirzo Bobur nomi bilan ataladi. Bularning hammasi ulugʻ shoir,  olim va mutafakkir,  buyuk davlat arbobi, ulugʻ hazrat – donolarning donosi Mir Alisher Navoiy bobomiz va oʻzbek mumtoz adabiyotining yirik vakili,  buyuk shoir,  tarixchi,  mohir sarkarda,  boburiylar sulolasi asoschisi,  oʻzining sermazmun ijodi bilan adabiyotimiz xazinasiga ulkan hissa qoʻshgan ulugʻ siymo – Zahiriddin Muhammad Bobur bobomizning hurmatlari uchundir.  

Har yili fevral – maktablarda adabiyot fan oyligi deb belgilanadi.  Adabiyot fani oyligi doirasida ayni kunlarda buyuk bobokalonlarimiz Alisher Navoiy hamda Zahiriddin Muhammad Bobur ijodiy merosiga bagʻishlangan adabiy kechalar,  maʼnaviyat soatlari,  maʼrifiy tadbirlar tashkil etilmoqda.
Xolimbeg ovulidagi 17-sonli umumiy oʻrta taʼlim maktabida ham “Alisher Navoiy va Zahiriddin Muhammad Bobur gʻazaliyoti muxlisiman” mavzusida adabiy-musiqiy tadbir tashkil etildi.  Oʻquvchilar Navoiy va Bobur gʻazallarini oʻqishdi,  sahna koʻrinishlari ijro etishdi.  Ayniqsa, 9-sinf oʻquvchilari tomonidan ijro etilgan maqom yigʻilganlarda katta taassurot qoldirdi.  Tadbir haqiqiy ziyo,  maʼrifat va maʼnaviyat kechasiga aylanib ketdi.

Darhaqiqat,  oʻlmas isteʼdod sohiblari Alisher Navoiy va Zahiriddin Muhammad Boburning boy adabiy merosi oradan besh asrdan ziyod vaqt oʻtsa hamki,  hamon xalqimiz maʼnaviy dunyosini boyitib kelmoqda.  Ularning bebaho asarlari va porloq siymosi xalqimiz qalbida abadiy yashayveradi.

Inobat RAJABOVA, 17-sonli maktab oʻqituvchisi.