FERMER XOʻJALIGIDA PUDRATChILAR, IShChILAR UChUN HOSIL BAYRAMI OʻTKAZILDI

Kuz fasli hech bir hududda bizning mamlakatimizdagiday masʼuliyatli, qistovli kechmasa kerak. Boisi iqtisodiyotimizning asosini agrar soha tashkil etadi va tabiiyki, koʻklamda ekilgan ekinlar hosili aynan shu faslda yigʻishtirib olinadi. Ayniqsa asosiy ekin – paxta yigʻim -terimi koʻp kuch talab qiladi. Shunday damlarda bir- birovga koʻmakka kelish, ish bilan band boʻlmaganlarning hasharga chiqishi ham azaliy qadriyatlarimizdan.

Joriy yilgi yigʻim –terim mavsumida 36 gektar yerda moʻl paxta hosili yetishtirilgan “Zarifboy - Toʻlgʻonoy” fermer xoʻjaligida yillik shartnomaviy rejalarning barvaqt oshirib ado etilishida 28 nafar pudratchilarga koʻmakdosh boʻlgan uyushmagan aholining ham hissasi katta boʻldi. Xoʻjalikda mavsum davomida 84 tonna oʻrniga 100 tonnadan ziyod paxta yigʻishtirib olindi.Yillik shartnomaviy reja esa 4-oktyabrda ado etildi.

Xoʻjalikda joriy yilda bugʻdoy va boshqa qishloq xoʻjalik ekinlaridan ham koʻzlanganidan ziyod hosil olindi. Shu boisdan 20-oktyabr kuni xoʻjalikda mazkur qishloq xoʻjalik yili muvaffaqiyatli yakunlanayotgani munosabati bilan ulkan tadbir tashkil etildi.

Tadbirda pudratchilar va yigʻim – terim mavsumida ularga qoʻl – qanot boʻlayotgan uyushmagan aholi , barcha ishchilar uchun toʻkin dasturxon yozildi, palov tortilib, koʻngilli hordiq chiqarishlari uchun tumanimizning taniqli sanʼatkorlari ishtirokida kontsert namoyish etildi.

Tadbirda xoʻjalikda qoʻlga kiritilgan yutuqlarga munosib hissa qoʻshgan pudratchilar ,ishchilar va barcha koʻmakchilarga sovgʻalar taqdim qildik, unumli mehnatlari uchun minnatdorchilik bildirdik. Bundan ularning koʻngli togʻday koʻtarildi,- deydi fermer xoʻjaligi raisi Umida Qurbonboyeva.