Tumanda odam papilloma virusiga qarshi 1550 nafar oʻsmir qizlar emlandi

Oʻzbekistonda milliy emlash kalendari boʻyicha bolalar davlat hisobidan 12 ta boshqariladigan infektsiyaga qarshi profilaktik emlanadi. Odam papilloma virusiga qarshi vaktsinaning 13-emlash sifatida joriy qilinishi yana bir ogʻir kasallik — bachadon boʻyni saratoni xastaligining oldini olishga xizmat qiladi. Jahon Sogʻliqni Saqlash Tashkiloti emlash tadbirini 9-13 yoshli qizlar oʻrtasida oʻtkazishni tavsiya etadi. Ushbu vaktsina joriy yildan mamlakatimizda milliy emlash kalendariga kiritilib, qizlar davlat hisobidan bepul emlanadigan boʻldi. Natijada, Oʻzbekistonda 2060-yillarga borib ayollarning bachadon boʻyni saratoni bilan kasallanish hollariga barham berilishi kutilmoqda.
Bugungi kunda jahonning 96 davlati uni oʻz milliy emlash kalendariga kiritgan. Ularning orasida Buyuk Britaniya, Daniya, Shvetsiya, Finlandiya kabi qator  Yevropa davlatlari,  shuningdek, AQSh, Kanada, Avstraliya va Lotin Amerika mamlakatlari ham bor. Shunday qilib, 2006-yildan boshlab  shu kungacha butun dunyoda 100 million nafardan ortiq  odam ushbu vaktsina bilan emlangan.

Odam papillomasi virusiga qarshi emlash vaktsinasi ayollarda uchraydigan bachadon boʻyni saratonining oldini olishning samarali usullaridan sanaladi. Ayniqsa, oʻsmir yoshdagi qizlarni rejali emlash kelgusida 1100 ta kasallanish holati va ushbu kasallik tufayli yuz beradigan ayollar oʻlimining oldini olishga yordam beradi.

Tumanimizda ham Oʻzbekiston Respublikasi SSVning 0239-07/3-sonli “Yuqumli kasalliklarga qarshi immunoprofilaktika oʻtkazish” toʻgʻrisidagi emlash kalendariga asosan 21-oktyabrdan 1-noyabrgacha boʻlgan vaqt oraligʻida 1 667 nafar 9 yoshdagi oʻsmir qizlarni emlash rejalashtirildi. Emlash ishlarini oʻtkazish uchun tibbiyot xodimlarining malakasi oshirildi va ular ishtirokida targʻibot ishlari oʻtkazildi. Tumanimizdagi umumtaʼlim maktablarida va davolash-profilaktika muassasalarida 13 ta emlash brigadasi tomonidan 1550 nafar 9 yoshdagi oʻsmir qizlarda vaktsina bilan emlash ishlari oʻtkazildi. Emlash kunlari tibbiy cheklov berilgan va tumanimizdan tashqariga vaqtincha ketgan qizlar oʻrtasida esa ayni paytda ham emlash ishlari amalga oshirilmoqda.

Odam papilomasi virusiga qarshi emlangan qizlar kelajakda ushbu virus keltirib chiqaradigan xavfli jinsiy kasalliklardan toʻliq himoyada boʻladi. Vaktsina qizlarning reproduktiv funktsiyasiga umuman salbiy taʼsir koʻrsatmaydi. Oʻtkazilgan xalqaro ilmiy tadqiqotlarda mazkur vaktsinaning nafaqat saratondan himoyalash, balki, reproduktiv aʼzolar salomatligini ham yanada mustahkamlash xususiyatiga ega ekanligi tasdiqlandi. Dunyoda birinchilardan boʻlib kirishilayotgan ushbu jarayon ayollar oʻrtasida onkologik kasalliklarning oldini olish, reproduktiv salomatlikni mustahkamlashga xizmat qiladi.

Gulshod Tajiboyeva, tuman DSENM epidemiologiya boʻlimi mudirasi.