HAR BIR BEMOR EʼTIBORDA
Oʻzbekiston Respublikasi Prezidentining 1998-yil 10-noyabrdagi 2107-sonli “Sogʻlikni saqlash tizimini isloh qilish toʻgʻrisida”gi Farmoni ijrosini taʼminlash maqsadida tuman markaziy shifoxonasi maʼmuriyati buyrugʻiga koʻra, 2000-yilda 15 ta oʻringa ega Shoshilinch tibbiy yordam boʻlimi tashkil qilindi. Ayni kunga kelib boʻlimda oʻrinlar soni 40 taga yetkazildi.
Boʻlimda jami 20 nafar oliy, 5 nafar 1 toifali va 6 nafar 2-toifali shifokorlar xalq salomatligi yoʻlida fidoyilik bilan mehnat qilishmoqda.
Boʻlim binosida 2013-yilda rekonstruktsiya ishlari, 2018-yilda esa joriy taʼmirlash ishlari bajarilgan boʻlib, bemorlarga oʻz vaqtida tashxis qoʻyish va samarali davolash uchun barcha shart-sharoitlar yetarli. Boʻlim endoskop, UZI, EKG jihozlari bilan taʼminlangan. Boʻlim qoshida zamonaviy raqamli rentgen uskunasi bilan jihozlangan xona, barcha zarur laborator anjomlar, reaktivlar bilan taʼminlangan ekspress laboratoriya kecha-yu kunduz faoliyat olib boradi. Ikkinchi qavatda jarrohlik boʻlimi joylashgan boʻlib, steril materiallar saqlash xonalari va jarrohlik zali bor. Shoshilinch jarrohlik amaliyotlari va barcha turdagi jarrohlik ishlarini amalga oshirish uchun zarur zamonaviy asbob-anjomlar bilan taʼminlangani shifokorlarimiz uchun qulaylik yaratmoqda.
Boʻlimda shoshilinch tibbiy yordamga muhtoj bemorlarga oʻz vaqtida malakali yordam koʻrsatish uchun yetarlicha shart-sharoitlar mavjud boʻlib, 2018-yil davomida jami 6124 nafar, 2019-yilning 9 oyi davomida esa jami 4584 nafar bemor davolanib, sogʻ-salomat oilalari bagʻriga qaytdilar.
Boʻlim shifokorlari tun-u kun, har qanday vaziyatda xalq salomatligi yoʻlida fidoyilik bilan xizmat qilib, oʻzlarining zimmalaridagi vazifalarini sharaf bilan uddalashmoqda. Bu yerga najot istab kelgan insonlarning qalblarida umid va ishonch uygʻotib, oilalari bagʻriga sogʻ-salomat kuzatib qolish har bir shifokor uchun eng oliy maqsaddir.
Men fursatdan foydalanib, barcha hamkasb doʻstlarimizni, ustoz shifokorlarni anʼanaviy kasb bayramlari bilan chin dildan tabriklayman.
O.ShOMURODOV,
TTB Shoshilinch tibbiy yordam boʻlimi mudiri.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
