“YaXShILIKLAR OLAMI” – YoSh TOMOShABINLARGA MANZUR BOʻLMOQDA

Qilichboy madaniyat markazi xodimlari aholining madaniy dam olishlari, boʻsh vaqtlarini koʻngilli oʻtkazishlari uchun koʻpgina tadbirlar tashkil qilishib, tomoshabinlar eʼtiboriga havol etishayapti. Markazda uchta toʻgarak – ashula, drama va doira toʻgaraklari tashkil qilingan boʻlib, ovulning sanʼatsevar yoshlarini qamrab olgan. Toʻgaraklarga Oʻktam Bozorboyev, Mirsaid Qodirov va Doniyorbek Bobojonovlar rahbarlik qilishadi.

Yaqinda Mirsaid Qodirov yana bir ezgu ishga qoʻl urdi. Iqtidorli va sanʼatsevar yoshlarni jamlab, “Yosh tomoshabinlar teatr jamoasi” tashkil etdi va ulkan rejalar bilan ijodiy ishlarni boshlab yubordi.

Muhtaram Yurtboshimizning yoshlar maʼnaviyatini yuksaltirish va boʻsh vaqtlarini mazmunli tashkil etish borasida belgilab bergan beshta tashabbusi ijrosini taʼminlash maqsadida jamoa tarbiyaviy ahamiyatga ega boʻlgan oʻzbek xalq ertaklari asosida “Yaxshiliklar olami” deb nomlangan tomosha sahnalashtirishdi.

Asosan kichkintoy bolajonlarga moʻljallangan tomosha shu kungacha tumanimizning 12 ta maktabgacha taʼlim tashkilotlarida namoyish etildi va tomoshabinlarga juda manzur boʻldi.

Tomoshalarda bolajonlar “Yosh tomoshabinlar teatr jamoasi” aʼzolari Qadamboy Matsafoyev ijro etgan yalmogʻiz, Diyorbek Xudoyberganov ijrosidagi masxaraboz, Ogʻabek Oʻrozmatov ijrosidagi qaroqchi, Damir Shuhratov ijrosidagi quyoncha, Oʻlmasbek Xudoyberganov ijrosidagi arslon obrozlari orqali gavdalantirilgan yaxshilikning yovuzlik ustidan gʻalaba qozonishini, buning uchun mardlik va olijanoblik kerakligini chuqur anglab yetdilar.

Tomoshaning “Yaxshiliklar olami” deb nomlanishi ham ramziy maʼnoga ega.

Maktabgacha taʼlim tashkilotlarida namoyish etilgan bu tomoshaning iliq kutib olingani ijodkorlarni yangi-yangi ijodiy ishlarga ruhlantirmoqda.

Qilichboy Madaniyat markazida yaqinlashib kelayotgan yangi yil bayramiga bagʻishlab tayyorlanayotgan ulkan musiqali dasturda ham “Yosh tomoshabinlar teatr jamoasi” chiqishlari joy olgan. Ilk mehnati mevasi - “Yaxshiliklar olami” tomoshasi kichkintoylargagina emas, ularning ota-onalariga ham manzur boʻlayotgani jamoa aʼzolarini yangi-yangi ijodiy ishlarga ruhlantirmoqda.

Oygul RAJABOVA.