“E-IJRO AUKSION” elektron auktsionlarida ishtirok etish tartibi tushuntirildi

Yakka tartibda uy-joy qurish uchun olinadigan yer uchastkalari endilikda “E-IJRO AUKSION” elektron auktsionlarida savdoga qoʻyilmoqda. Navbatdagi lavhamiz mazkur yangi tartibni aholi oʻrtasida tushuntirish maqsadida oʻtkazilgan yigʻilish xususida.

Oʻzbekiston Respubli kasi Vazirlar Mahkamasining 2019-yil 28-yanvar kungi “Yer uchastkalari berish va yakka tartibdagi uy-joy qurish uchun yer uchastkalariga meros qilib qoldiriladigan umrbod egalik qilish huquqini realizatsiya qilishning zamonaviy va shaffof mexanizmlarini joriy etish boʻyicha qoʻshimcha chora-tadbirlar toʻgʻrisida”gi qaroriga muvofiq yakka tartibda uy-joy qurish uchun olinadigan yer uchastkalari endilikda “E-IJRO AUKSION” elektron auktsionlarida savdoga qoʻyilmoqda.

9-sonli Bolalar musiqa va sanʼat maktabida tuman aholisiga mazkur qarorda koʻrsatilgan talablar va “E-IJRO AUKSION” elektron auktsionlarida ishtirok etish tartibi boʻyicha batafsil tushuncha berish maqsadida yigʻilish oʻtkazildi. Yigʻilishda tuman hokimining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosari Jasur Norimov, Qoraqalpogʻiston Respublikasi “Yermulkkadastr” davlat korxonasi tuman filiali boshligʻi Shokir Davletov, tuman Adliya boʻlimi boshligʻi Moʻminjon Matyusupov hamda tegishli korxona-tashkilotlar masʼullari, fuqarolar yigʻinlari raislari ishtirok etdilar.

Yigʻilishda Vazirlar Mahkamasining yuqoridagi qarori haqida batafsil tushunchalar berildi. Masʼullar tomonidan yakka tartibda uy-joy qurish uchun yer uchastkalari meros qilib qoldiriladigan umrbod egalik qilish huquqini realizatsiya qilish bundan keyin “E-IJRO AUKSION” yagona savdo maydonchasida elektron auktsionlar oʻtkazish yoʻli bilan amalga oshirilishi, uning tartibi batafsil tushuntirildi. Meros qilib qoldiriladigan umrbod egalik qilish huquqi elektron onlayn-auktsionlarda yer uchastkalari realizatsiya qilinishi mazkur qarorda belgilab qoʻyilgani, yer uchastkalari faqat shaharsozlik hujjatlari, yaʼni aholi punktining bosh rejasi va tegishli qismining batafsil rejasi loyihasi bilan taʼminlangan hududlarda auktsionga qoʻyilishi aytildi.

Shuningdek, yakka tartibda uy-joy qurish uchun 4 sotixgacha boʻlgan va ushbu hajm doirasidagi yer uchastkalari halok boʻlgan harbiy xizmatchilar oilalariga, davlat va xususiy uy-joy fondidagi oʻzlari egallab turgan uy-joyni tuman yoki shahar hokimliklariga oʻtkazayotgan fuqarolar va mulkdorlarga auktsionsiz berilishi tushuntirib oʻtildi.

Tuman Adliya boʻlimi boshligʻi Moʻminjon Matyusupov fuqarolarga bu borada batafsil huquqiy tushunchalar berib oʻtdi. Shuningdek, “E-IJRO AUKSION” yagona elektron savdo maydonchasi – elektron onlayn-auktsionlarni tashkil etish va oʻtkazish uchun zarur axborot kiritish, saqlash va qayta ishlash, manfaatdor shaxslarning elektron onlayn-auktsionlar jarayonlaridan bevosita foydalanish imkonini taʼminlaydigan axborot tizimi sifatida tashkil etilganini taʼkidladi.

Undan tashqari, auktsionlar oʻtkazilishi haqidagi xabarnomalar 30 kun oldin “Elektron onlayn-auktsionlarni tashkil etish markazi”ning veb-portalida joylashtirilishi, auktsionda ishtirok etishga buyurtmanomalar xabarnoma joylashtirilgan kundan avtomatik tarzda boshlanishini, bu tizimning shaffof ekani qayd etib oʻtildi.

Yigʻilish davomida  ishtirokchilarni qiziqtirgan savollarga batafsil javoblar ham berildi.

Shu oʻrinda aytish kerakki, ayni kunlarda ham “E-IJRO AUKSION” yagona savdo maydonchasida Amudaryo tumanining Nazarxon, Amir Temur nomli ovullari hamda Qum yop, Tosh qalʼa va boshqa mahallalaridan yakka tartibda uy-joylar hamda aholiga maishiy xizmat koʻrsatish imoratlari qurish uchun yer maydonlari elektron auktsionlarga qoʻyilgan boʻlib, xohlovchilar unda ishtirok etishlari mumkin.