Saylov uchastkasiga kela olmaydigan fuqarolar xonadonlarida koʻchma saylov qutilaridan foydalanib ovoz berdilar

Bugun mamlakatimizda katta siyosiy jarayon – vakillik organlariga saĭlovlar oʻtkazilmoqda. Koʻtarinki ruh bilan oʻz konstitutsiyaviy huquqlarini amalga oshirish uchun saylov uchastkalariga tashrif buyurayotgan har bir fuqaro oʻzi maʼqul bilgan nomzodga ovoz bermoqda.

Saylov arafasida Oʻzbekiston Respublikasining Saylov kodeksi asosida, ochiq, demokratik tamoyillar, xalqaro printsiplarga rioya qilgan holda, respublikamizda faoliyat yuritayotgan beshta siyosiy partiya oʻrtasidagi sogʻlom raqobat asosida qizgʻin tayyorgarlik koʻrildi.

Bu yilgi saylov kampaniyasida yana muhim bir jihatga, yaʼni imkoniyati cheklangan fuqarolarning siyosiy tadbirda faol ishtirok etishiga shart-sharoit yaratishga alohida eʼtibor qaratildi. Imkoniyati cheklangan fuqarolarning ovoz berishda qatnashishi uchun saylov uchastkalari alohida jihozlandi. Nogironlarning aravachalar bilan bemalol binoga kirishi uchun alohida yoʻlaklar tashkil etildi. Bundan tashqari, kabinalarning biri nogironlarning yashirin ovoz berishi uchun moʻljallandi. Shuningdek, koʻzi ojiz fuqarolarga ular uchun moʻljallangan Brayl alifbosidagi saylov byulletenlari tayyorlandi. Bularning barchasi imkoniyati cheklangan shaxslar jamiyatimizning toʻlaqonli aʼzosi ekanini inobatga olgan holda amalga oshirildi.

Keksalar, yotoq sharoitidagi bemorlar uchun har bir saylov uchastkasiga 1 tadan, tuman boʻyicha 58 ta koʻchma saylov qutilari tashkil etildi. Siyosiy partiyalarning saylovoldi kampaniyasi bilan bogʻliq targʻibot materiallarini ularga ham yetkazib berish alohida nazoratga olindi. Shuningdek, saylov jarayonidan aholining xabardorlik darajasini yanada oshirish maqsadida “Men shaxsan oʻzim ovoz beraman”, “Bizning oilamizda har birimiz oʻz ovozimizga egamiz”, “Mening ovozim – Vatan kelajagiga daxldor”, “Biz tanlash huquqiga egamiz” mavzularida targʻibot tadbirlari oʻtkazib borildi.

Bugungi saylovda qonunga koʻra salomatligi yaxshi emasligi yoki boshqa sabablarga koʻra ovoz berish binosiga kela olmaydigan ayrim saylovchilarning yashash joylariga borib ovoz berishni amalga oshirish koʻzda tutilganligi sababli 86-saylov uchastkasida ham koʻchma saylov qutilaridan foydalanildi. Uchastka saylov komissiyasining 2 nafar aʼzosi roʻyxatga kiritilgan 25 nafar fuqaroning xonadonlariga koʻchma saylov qutisi bilan tashrif buyurdilar. Keksaligi, nogironligi va bemorligi tufayli uyidan chiqa olmaydigan fuqarolar bu tashrifdan nihoyatda mamnun boʻldilar.

Olmazor mahallasidagi Firdavsiy nomli koʻchada yashovchi 1-guruh nogironi Shamsiddin Sharipov hamda mahallaning eng keksa fuqarosi 92 yoshga kirgan Jumagul momo Jumaniyozovalar ham saylovda qatnashishlariga imkoniyat yaratgan saylov komissiyasi aʼzolarining fidoyiligidan va barcha qatori saylov imkoniyatidan foydalanayotganliklaridan juda xursand boʻldilar.

Shuningdek, 126-saylov uchastkasida tumanimizning eng keksa fuqarosi 102 yoshli Xadicha momo Bekanova ham koʻchma saylov qutisidan foydalanib ovoz berdi. Ularning barchasi mamlakatimiz hayotida muhim boʻlgan ushbu saylov jarayonida oʻzlarining eʼtibordan chetda emasligini his qildilar.

Vatandoshlarimiz ertangi kunimiz, yurt taqdiri, istiqboli va taraqqiyotiga befarq emas. Xalqimizning bilim-salohiyati, aql-idroki, huquqiy ongi hamda saviyasi yanada yuksalgan. Toʻla demokratik ruhda oʻtkazilayotgan bugungi saylovda har bir fuqaro oʻzi munosib deb bilgan, turmush sharoitimiz bilan tanish, el dardi bilan yashaydigan, xalqqa qayishadigan nomzodlarga ovoz bermoqda.

O.Xudoyberganova.