Sayyor sudda 9 nafar mahkum muddatidan ilgari ozod qilindi

Jinoyatga jazo muqarrarligini tushuntirish barobarida, jamiyatda adolat, insoniylik tamoyillarining ustuvorligini taʼminlash, adashib jinoyat koʻchasiga kirgan fuqarolarni jamiyatga qaytarish, sogʻlom ijtimoiy muhitni qaror toptirish kabi maqsadlar koʻzlanayotgan ana shunday tadbirlar natijasida jinoyatchilik va huquqbuzarliklar kamayishiga erishilmoqda.

Aytish joizki, mahkumlar huquqlarining soʻzsiz taʼminlanishi, shaʼni va qadr-qimmatining hurmat qilinishi, qayta jinoyat sodir etilishining oldini olishda Prezidentimizning 2018-yil 7-noyabrdagi “Jinoyat-ijroiya qonunchiligini tubdan takomillashtirish chora-tadbirlari toʻgʻrisida”gi Qarori muhim dasturilamal vazifasini oʻtamoqda. Mazkur qaror ijrosi doirasida probatsiya guruhlari hisobida turgan nazoratdagi shaxslar bilan keng jamoatchilik ishtirokida sayyor sud majlislari oʻtkazib kelinmoqda.

Yangi yil amudaryolik 9 nafar mahkumlarning oilalari uchun chindan ham quvonchli bayram boʻldi. tuman Ichki ishlar boʻlimining majlislar zalida oʻtkazilgan ochiq sayyor sud majlisida ilgari bilib-bilmay jinoyat sodir qilgan 9 nafar yurtdoshlarimizdan “Mahkum” degan tamgʻani olib tashlash masalasi muhokama qilindi.

Sayyor sudda Jinoyat ishlari boʻyicha tuman sudi raisi Sultonmurod Davletmurodov, tuman prokurori yordamchisi Sanjar Yormuhammedov, tuman Ichki ishlar boʻlimi boshligʻi, podpolkovnik Ulugʻbek Xudoyberganov, Yoshlar ittifoqi tuman Kengashi bosh mutaxassisi Muhiddin Oʻrozimbetov hamda tuman Probatsiya guruhi xodimlari qatnashdi.

Sud majlisida tuman Ichki ishlar organlari Probatsiya guruhi hisobida turgan jami 9 nafar mahkum oʻrnatilgan tartib-qoida talablarini bajarganligi va mehnatga halol munosabatda boʻlganligi sababli Oʻzbekiston Respublikasi Jinoyat kodeksining 73-moddasiga asosan shartli ravishda muddatidan ilgari ozod qilindi. Ularning mahkum degan tamgʻalari olib tashlandi va oilalari bagʻriga qaytarildi.

Shundan soʻng, tuman ichki ishlar boʻlimi boshligʻi, podpolkovnik Ulugʻbek Xudoyberganov va boshqalar soʻzga chiqib, oʻtgan yillarga nisbatan qayta jinoyatlarning soni kamayganligi va bu illatning oldini olish, fuqarolar xavfsizligini taʼminlash, har bir insonning jamiyatda munosib oʻrnini topib ketishiga koʻmaklashish uchun barcha birgalikda harakat qilish lozimligi haqida soʻzladilar. Profilaktik ahamiyatga ega boʻlgan, milliy qadriyatlarimiz, bagʻrikenglik tamoyillarimizga toʻla mos tushadigan bunday tadbirlar fuqarolarning huquqiy bilimlarini oshirishga xizmat qiladi.

I.Jabborberganov, tuman IIO Probatsiya guruhi katta inspektori, mayor.