YoShLAR UChUN KONTsERT DASTURI TAShKIL QILINDI

Bugungi kunda davlatimiz rahbari yoshlarga yuksak eʼtibor qaratmoqda. Bu esa butun yurtimiz boʻylab ertamiz kelajagi boʻlgan yoshlar bilan hukumat rahbarlarining uchrashuvlar tashkil qilib, ular bilan yanada mustahkam aloqa oʻrnatayotganlarida oʻz aksini topmoqda.

Qoraqalpogʻiston Respublikasi yoshlari bilan uchrashish, ularning barcha sohalar yuzasidan takliflarini hamda ularni qiynayotgan muammolarni oʻrganish, ularga barham berish, yoshlarni qiziqtirayotgan savollariga javob topish maqsadida maxsus ishchi guruh tuzilgan. Ushbu ishchi guruh ilk uchrashuvni tumanimiz yoshlari bilan boshladi.

Taʼkidlash kerakki, shu maqsadda Oʻzbekiston Respublikasidagi barcha vazirliklardan, korxona-tashkilotlardan vakillar jalb qilingan. Vazirliklar masʼul xodimlaridan 20 nafari tumanimiz yoshlari bilan uchrashuvda ishtirok etdi.

Ishchi guruh kunning ikkinchi yarmida “Qilichboy” ovul fuqarolar yigʻini hududidagi Xotira maydonida yosh tadbirkorlarning ish faoliyati bilan tanishdi. Uchrashuvni Qoraqalpogʻiston Respublikasi Vazirlar Kengashi Raisi Qahramon Sariyev ochib berdi.

Qoraqalpogʻiston Respublikasi fidoyi yoshlar guruhi aʼzolari yurtimizda yoshlarga yaratilayotgan shart-sharoitlar, imkoniyatlar haqida nutq soʻzladi. Guruh aʼzolarining ajoyib chiqishlari barchaga yuqori kayfiyat bagʻishladi.

Taʼkidlanganidek, mamlakatimizda yoshlarimizning oʻqib-bilim olishi, oʻzi qiziqqan soha bilan shugʻullanishi, hayotda oʻz oʻrnini topishlari, komil inson boʻlib yetishishlari uchun barcha imkoniyatlar yaratilgan. Bunday eʼtiborga munosib farzand boʻlishga, qolaversa, imkoniyatlardan samarali foydalanib, yurt ravnaqiga oʻz hissasini qoʻshish uchun astoydil harakat qilayotgan yoshlarimiz ham talaygina. Ularning erishayotgan yutuqlari bilan maqtansak, arziydi.

Uchrashuv chogʻida tumanimizning yosh tadbirkorlarining koʻrgazmalari tashkil qilindi. Oʻzbekiston Respublikasi Prezidentining fuqarolar huquqlarini himoya qilish, murojaatlar bilan ishlashni nazorat qilish va muvofiqlashtirish masalalari boʻyicha maslahatchisi oʻrinbosari Alisher Usmanov, Qoraqalpogʻiston Respublikasi Vazirlar Kengashi Raisi Qahramon Sariyevlar tumandagi yosh tadbirkorlar bilan samimimiy suhbat olib bordi. Ularning tadbirkorlik faoliyatlarini qanday boshlaganlari, yosh tadbirkorlarning kelgusidagi maqsadlari bilan qiziqdilar.

Shuningdek, xotira maydonida maʼnaviy-maʼrifiy tadbir boʻlib oʻtdi. Tadbirda faol yoshlar, tumanimizdagi harbiy safarbarlik qismlarida xizmat qilayotgan askarlar ham oʻzlarining isteʼdodlarini namoyish qilishdi.

Tuman Madaniyat boʻlimi tomonidan tayyorlangan kontsert dasturi dillarga xushnudlik bagʻishladi. Tumanimiz sanʼatkorlari oʻzlarining eng sara kuy-qoʻshiqlarini kuyladilar. Tadbir haqiqiy yoshlar bayramiga aylanib ketdi.

Charos Arslonova, tuman hokimligi axborot xizmati rahbari.