RESPUBLIKA IShChI GURUHI AʼZOLARI DARYo BOʻYI MAHALLASI YoShLARI BILAN UChRAShDI
Yoshlarga eʼtibor – kelajakka eʼtibor! Bu shunchaki balandparvoz gap emas. Bugungi tezkor, yangilanishlar shiddat bilan kechayotgan davrda yoshlarning intellektual va ijodiy salohiyatini yuksaltirish, mamlakatimizda amalga oshirilayotgan keng qamrovli islohotlarga daxldorligini, masʼuliyatini oshirish juda muhim. Boisi, zamonaviy bilim va koʻnikmalarga ega, maʼnan yetuk, jismonan kuchli, matonatli, sadoqatli yoshlargina mamlakat kelajagi uchun javobgarlikni oʻz zimmalariga ola oladilar, yurt koriga yaraydilar. Shu sababdan jamiyatimizning asosiy harakatlantiruvchi kuchi hisoblanmish yosh avlod taʼlim-tarbiyasini, ularning maʼnaviy-maʼrifiy, ruhiy, ijtimoiy, jismoniy salohiyatini oshrishga ulkan ahamiyat qaratilmoqda.
Bu borada amalga oshirilayotgan ishlar natijasi bilan yaqindan tanishish va muammoli masalalarda amaliy yordamlar berish maqsadida tumanimizga tashrif buyurgan Respublika ishchi guruhi aʼzolari barcha hududlarda yoshlar bilan uchrashuvlar tashkillashtirdilar, maktablarda, mehnat jamoalarida boʻldilar, tadbirkor yoshlar faoliyati bilan tanishib, ijodkor yoshlar mushoiralarini oʻtkazdilar
Ishchi guruh aʼzosi, “OʻzAvtoyoʻl” qoʻmitasi boʻlim boshligʻi Otanazar Jumaniyozov Qipchoq ovul fuqarolar yigʻini tarkibidagi Daryo boʻyi mahallasida istiqomat qiluvchi Zarifboy Xoʻjamurodov xonadonida boʻlib, ushbu xonadonning va qoʻni- qoʻshnilarining farzandlari bilan suhbatda boʻldi.
Mehmon suhbat chogʻida yoshlarning qiziqishlari, oʻqishlari, turmush tarzi bilan tanishdi. Xonadonga yigʻilgan oʻn nafardan ziyod bolalar ishtirokida boʻlgan darsdan boʻsh vaqtlarida nimalar bilan shugʻullanishlari, qaysi shoir, yozuvchilar ijodini sevib oʻqishi, xullas, adabiyot, sanʼat, sport borasidagi suhbat juda qiziqarli oʻtdi. Ayniqsa, Otanazar Jumaniyozovga bolalarning hozirgi davr va mumtoz adabiyotimiz namunalarini ifodali, yoddan aytishi, rasmlar chizishi, musiqa asboblarini chalishi va qoʻshiqlar ijro etishi juda manzur boʻldi.
Xabardor qilinmasdan, toʻsatdan kirib borgan xonadonida yoshgina yigitning ispancha operani mahorat bilan kuylagani mehmonni biroz hayratlantirdi ham. U Nukusdagi sanʼat kollejini bitirib kelib, yaqindagina 21-sonli Bolalar musiqa va sanʼat maktabida opera xonandaligi guruhida murabbiylik faoliyatini boshlagan, iqtidorli yigit Sherxon Oʻtamurodov edi. Uchrashuv soʻngida 21-sonli Bolalar musiqa va sanʼat maktabi direktori Nuraddin Yoqubov ijrosidagi shoʻx qoʻshiqqa mezbon-u mehmonlar raqsga tushdilar.
Daryo boʻyi mahallasi yoshlari bilan oʻtkazilgan uchrashuv Respublika ishchi guruhi aʼzolarida iliq taassurotlar qoldirdi. Bu mamlakatimizda yoshlarning munosib boʻlib ulgʻayishlariga qaratilayotgan eʼtibor mevasidir.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
