TUMAN MADANIYaT MARKAZIDA NAVOIY TAVALLUDINING 579 YILLIGIGA BAGʻIShLANGAN TADBIR OʻTKAZILDI

Ayni kunlarda mamlakatimizning barcha hududlarida boʻlgani kabi tumanimizdagi umumiy oʻrta taʼlim maktablarida, maktabgacha taʼlim tashkilotlarida, barcha madaniyat muassasalarida soʻz mulkining sultoni, ulugʻ mutafakkir bobomiz Alisher Navoiy tavalludining 579 yilligi keng nishonlanmoqda. Oʻtkazilayotgan maʼnaviy-maʼrifiy tadbirlarda oʻzbek mumtoz adabiyotining ulugʻ namoyandasi hayoti va ijodi haqida keng soʻz yuritilmoqda, asarlarining xalqchilligi, ulkan  tarbiyaviy ahamiyatga  ega ekanligiga yuqori baho berilmoqda, yoshlar Navoiy asarlarini oʻqib-oʻrganishga daʼvat etilmoqda.

Shu yilning 8-fevralida tuman Madaniyat markazi tomoshalar zalida boʻlib oʻtgan “Gʻazal mulkining sultoni” deb nomlangan maʼnaviy-maʼrifiy tadbir ham mir Alisher Navoiy hayoti va ijodiy faoliyatiga bagʻishlandi.

Tadbirda Mangʻit shahrida joylashgan maktablar oʻquvchilari, oʻqituvchilari, shuningdek, boʻlim xodimlari, 9-sonli Bolalar musiqa va sanʼat maktabi oʻqituvchilari, oʻquvchilari ishtirok etdilar.

Tadbirni boʻlim mutaxassisi Oybek Begimov ochdi va olib bordi.
Yigʻilganlar dastlab 16-sonli IDUM oʻqituvchisi Sevara Boltaboyevaning Navoiy bobomizning qaynoq ijod jarayoni bilan kechgan hayoti, zamona zayli tufayli chekkan mashaqqatlari, eng muhimi, shunday ogʻir sharoitda hayot kechirsa-da, dunyo ilm-faniga qoʻshgan benazir hissasi haqidagi maʼruzasini tingladilar. Shuningdek, maʼruzada mamlakatimizda yosh avlodni ulugʻ ajdodlarimizning oʻlmas merosi, milliy va umuminsoniy qadriyatlar asosida tarbiyalashga alohida eʼtibor qaratilayotganligi, yoshlarning bu boradagi bilimini boyitish va ragʻbatlantirish maqsadida koʻrik-tanlovlar, maʼnaviy-maʼrifiy kechalar oʻtkazilayotganligi, xususan,  Alisher Navoiy merosini keng va atroflicha oʻrganish, ularning asarlarida ulugʻlangan gʻoyalar mazmunini xalqimizga yetkazish yuzasidan bir qator ishlar amalga oshirilayotganligi alohida taʼkidlandi.

Shunday soʻng, tuman Madaniyat markazi mutaxassisi Oybek Begimov rejissyorligida 16-,30-,38-,40-sonli maktablar oʻquvchilari ishtirokida Navoiy asarlaridan sahnalashtirilgan koʻrinishlar namoyish etildi. Oʻquvchilarning ulugʻ adib gʻazal, ruboiy va boshqada janrlardagi nazmiy asarlarini yuksak mahorat bilan ifodali oʻqiganlari – ularning shoir ijodiga hurmat-ehtiromining ifodasi boʻldi desak, adashmaymiz.
Tadbir Navoiy sheʼrlari, gʻazallari bilan aytiluvchi musiqiy dastur bilan davom etdi.

Taniqli xonandalar Anvar Xudoyberganov, Murodjon Ibragimov, shuningdek, Farhod Xudoyberganov, Sayfullo Gulmonov, Xursand Shukurullayev va 9-sonli Bolalar musiqa va sanʼat maktabi oʻquvchilari ijro etgan qoʻshiqlar, kuylar barchaga manzur boʻldi.

Maʼnaviy-maʼrifiy tadbirda yigʻilganlar bu sahnalashtirilgan dastur orqali Navoiy hayoti va ijodiy faoliyati boʻyicha yanada koʻproq maʼlumotga ega boʻlishdi. Ular qalbiga Navoiy ijodi, unga ehtirom tuygʻulari yana ham chuqurroq joylandi, tasavvurlari boyitildi, yana ham teran oʻqib-oʻrganishga ishtiyoq uygʻotdi.

O.RAJABOVA.