TUMANIMIZDA GʻALLAChILIK KLASTERI TUZILDI
Mamlakatimiz qishloq xoʻjaligiga joriy etilayotgan islohotlar mahsulot yetishtirishni koʻpaytirishga va sifatini yaxshilashga xizmat qilmoqda. Albatta, sohadagi ishlarni ilm, fan yutuqlaridan va jahon ilgʻor tajribalaridan unumli foydalangan holda tashkil etish ham juda muhim.
Joriy yil boshida tumanimizda taʼsischi “Toʻlqinli Ismoil chorvador” fermer xoʻjaligi raisi Shuhrat Matkarimov boshchiligida “AMU RICH HARVEST” gʻallachilik klasteri oʻrnatilgan tartibga koʻra, 2020-yil gʻalla hosilidan boshlab, tashabbuskorning bevosita oʻz xoʻjaligiga qarashli yer maydonlarida hamda boshoqli donni fermer xoʻjaliklaridan shartnoma boʻyicha xarid qilish asosida tuzildi.
Oʻzbekiston Respublikasi Vazirlar Mahkamasining 2019-yil 24-sentyabrdagi “Boshoqli don yetishtirishda klaster tizimini bosqichma-bosqich joriy etish orqali yuqori hosildorlikni taʼminlashga doir qoʻshimcha chora-tadbirlar toʻgʻrisida”gi 806-sonli Qaroriga muvofiq tashkil etilgan gʻallachilik klasteri raisi Shuhrat Matkarimov tumanimizda faoliyat yuritayotgan fermer xoʻjaliklari rahbarlari bilan 1500 gektar gʻalla maydoni kelajagi uchun shartnoma imzoladi.
Ekilgan bugʻdoy dalalaridan koʻzlanganiday hosil olish uchun barcha fermer xoʻjaliklari hududlaridagi bugʻdoylar agrotexnika qoidalariga muvofiq oziqlantirildi. Xususan, “Amu sohili” fermer xoʻjaligida urugʻ sepilgan vaqtda har gektar hisobiga 400 kilogrammdan fosfor berilgan edi.
Ayni kunlarda esa “Toʻlqinli Ismoil chorvador” chorvachilikka ixtisoslashgan fermer xoʻjaligi molxonalaridan mahalliy oʻgʻit olib chiqilib, qish chillasida ham bir tekis yam-yashil boʻlib turgan bugʻdoyzorlarga sepilmoqda, jarayonning hammasi zamonaviy texnikalar yordamida bajarilmoqda. Vaqtida oziqlantirilgan, sugʻorilgan bugʻdoy dalalaridan 70-80 tsentnerdan hosil yetishtirish imkoniyati yaratiladi.
Gʻallachilik klasteriga qarashli gʻalla maydonlarida yetishtirilgan hosilni yigʻib-terib olish uchun ham texnikalarni, kombaynlarni shay qilib qoʻyishga eʼtibor qaratilmoqda.
Aytish mumkinki, “Toʻlqinli Ismoil chorvador” fermer xoʻjaligi tumanimizda chetdan ilk zotdor mollar keltirilib, chorvachilik rivojiga ulkan hissa qoʻshgan chorvachilik xoʻjaliklaridan hisobladi.
Gʻallachilik klasteriga asos solgan mazkur xoʻjalik rahbariyati kelgusida klaster usulida yetishtirilgan gʻallani qayta ishlashni yoʻlga qoʻyishni niyat qilgan. Yaqin kunlarda Turkiyadan zamonaviy un tegirmonini olib kelib oʻrnatishni, mahsulotni qayta ishlash orqali gʻalla yetishtiruvchilar daromadi yuqori boʻlishini taʼminlashni rejalashtirilmoqda.
Qishloq xoʻjaligi tumanimiz iqtisodini yuksaltirishda, aholi farovonligini taʼminlashda muhim oʻrin tutadi. Bozorlarimiz toʻkin, xalqimiz rizqi moʻl-koʻl boʻlishidan tortib eksportdan qoʻshimcha daromad topishgacha boʻlgan juda koʻp masalalar shu yoʻnalish bilan bogʻliq hisoblanadi. Yuqori hosildorlik va toʻkinlik garovi boʻlgan klaster usuli esa bu borada samaradorlik yuqori boʻlishiga va hosildorlik yanada ortishiga xizmat qiladi.
O. Rajabova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
