El salomatligi yoʻlida

Mamlakatimizda aholi salomatligini taʼminlash borasida olib borilayotgan izchil va keng koʻlamli ishlar samarasida bugun qishloqda ham shahardagi tibbiyot maskanlaridan qolishmaydigan zamonaviy tibbiy sharoitlarga ega, moddiy-texnik negizi mustahkam birlamchi shifo maskanlari faoliyat koʻrsatmoqda. Tumanimizdagi "Madaniyat” qishloq vrachlik punkti ham shu kabi tibbiyot muassasalari safiga kiradi.

Aytish joizki, mustaqillik yillarida barcha sohalarda boʻlgani kabi sogʻlikni saqlash tizimida ham tub islohotlar amalga oshirilib, bugun sogʻlikni saqlash muassasalari jahon andozalar talablari darajada faoliyat koʻrsatmoqda.

Ayniqsa qishloq aholisi tibbiy xizmat koʻrsatish tubdan yaxshilash machsadida qishloq vrachlik punktlari faoliyati yoʻlga qoʻyilib, aholini sogʻligini saqlashga xizmat qilmoqda. Tibbiyot mutaxassislari mahallalar va taʼlim muassasalarida sogʻlom turmush tarzini shakllantirish, erta va qarindoshlar oʻrtasidagi nikohlarning oldini olish boʻyicha targʻibot tadbirlarini muntazam oʻtkazib kelmoqdalar. Qishloq vrachlik punktlaridagi umumiy amaliyot, kunduzgi shifoxona, fizio, laboratoriya, ayollar koʻrigi, emlash, muolaja, sterilizatsiya xonalari hamda dorixonalar zamon talablari darajasida faoliyat yuritmoqda. Zamonaviy tibbiyot tahlil-tashhis apparatlari reproduktiv yoshdagi ayollar, bolalar va oʻsmirlar tibbiy koʻrigini yuqori saviyada tashkil etishda muhim ahamiyat kasb etmoqda. Natijada aholining salomatligi kun sayin yaxshilanib, kasallik koʻrsatkichlari kamayib bormoqda. Tumanimizdagi "Madaniyat” qishloq vrachlik punkti xodimlari ham shu kabi maqsad va vazifalarni oldiga qoʻygan holda ish olib bormoqdalar. Mazkur tibbiyot muassasasi 2001-yilda ish boshlagan va tumanimizning Toʻlqin va Choykoʻl ovuli aholisi sifatli tibbiy xizmat koʻrsatib kelmoqda.

Qishloq vrachlik punkti xizmat koʻrsatadigan ushbu hududlarda jami 5552 nafar aholi istiqomat qiladi. Shundan tugʻish yoshidagi ayollar soni 1573 nafar, bir yoshgacha boʻlgan bolalar 96 nafar, oʻsmirlar 290 nafar, 14 yoshgacha boʻlgan bolalar 1539 nafar, kattalar esa 3501 nafarni tashkil etadi. "Madaniyat” qishloq vrachlik punktida 3 ta umumiy amaliyot shifokorlari, 10 nafar hamshiralar xizmat qiladi. Qishloq vrachlik punkti Salomatlik-1 loyihasi doirasida tibbiy asbob-uskunalar bilan toʻliq jihozlangan.

Aytish joizki, muntazam ravishda oʻtkazib kelinayotgan "Salomatlik haftaligi" tadbirlari bugun oʻz samarasini berib, aholining tibbiy bilim darajasi oshishiga xizmat qilmoqda. Aholi salomatligini mustahkamlashga yoʻnaltirilgan bunday profilaktika tadbirlari doirasida tumanimizda ham respublika tibbiyot muassasalarining malakali shifokorlari, "Ona va bola" skrining markazi, Respublika salomatlik va tibbiy statistika instituti hududiy boʻlimi mutaxassislaridan iborat guruhlar joylarda boʻlib, xotin-qizlar, bolalar va oʻsmirlarni chuqurlashtirilgan tibbiy koʻrikdan oʻtkazmoqda.

Bu kabi xayrli ishlarda "Madaniyat” qishloq vrachlik punkti xodimlari ham faol ishtirok qilib, chuqurlashtirilgan tibbiy koʻrikka aholini jalb qilish va tekshiruv oʻtkazish ishlarida yaqindan yordam berib kelmoqda.

Bugungi kunda birlamchi tibbiyot muassasalari nafaqat tibbiy xizmat koʻrsatish oʻrni, balki hududda sogʻlom turmushni targʻib etish maskaniga ham aylanmoqda. Aholi salomatligini muhofaza qilish, qishloqlarda tibbiy-sanitariya xizmatini yangi sifat bosqichiga koʻtarish boʻyicha belgilangan dasturlarni amalga oshirishda "Madaniyat” qishloq vrachlik punkti xodimlari ham fidoyilik bilan ish olib bormoqdalar.