YoSh STOL TENNISChILAR MUSOBAQASI OʻTKAZILDI

Bahorning ilk bayramida nafaqat goʻzal va nazokatli ayol-qizlarimizni sharaflovchi bayramona tadbirlar, barcha sohalarning faoli boʻlgan bu aziz insonlarga cheksiz hurmat va ehtirom tariqasida turli sport musobaqalari ham oʻtkazilishi yaxshi anʼanaga aylangan. Zero, Ayolning, onaning qadr-qimmatini hamisha baland tutish – xalqimiz uchun azaliy qadriyat hisoblanadi.

Ushbu goʻzal bayram munosabati bilan 56-sonli umumtaʼlim maktabida Bolalar va oʻsmirlar sport  maktabi birinchiligi uchun boʻlib oʻtgan stol tennisi boʻyicha sport musobaqalari ham munis va mehribon ayollarga bagʻishlandi.

Tumandagi Bolalar va oʻsmirlar sport maktabining stol tennisi boʻyicha murabbiylari ishtirok etgan mazkur guruhlararo musobaqalarda BOʻSM murabbiylaridan Dilshoda Rajabova, Hamida Rajabova, Guloyim Masharipova, Feruza Qobulova, Fozil Yeshchanov, Nasiba Ermanova, Akbar Mavlonov, Jahongir Jamolovlar 56-sonli maktabning stol tennisi toʻgaragi shugʻullanuvchilarining mahoratlarini xolislik bilan kuzatib bordilar.

Shunisi eʼtiborga molikki, 56-maktabda bir necha yillardan beri stol tennisi toʻgaragi faoliyat olib boradi. Mazkur toʻgarakka Dilshoda Rajabova murabbiylik qiladi. Toʻgarak mashgʻulotlarida uzviylikni taʼminlash, toʻgarak aʼzolarining mahoratlarini tinimsiz oshirib borish, ularni turli musobaqalarga tayyorlashda Dilshoda Rajabova stol tennisi boʻyicha mahoratli murabbiylar ishtirokidagi sport musobaqalari, mahorat darslari tashkil etishga alohida eʼtibor qaratadi. Aziz va nazokatli ayollar sharafiga tashkillashtirilgan musobaqa ham bir tomonning gʻolibligi va ikkinchi tomonning magʻlubligini aniqlashni emas, balki sportning ushbu turiga qiziquvchi yoshlarning bu boradagi bilim va koʻnikmalarini oshirishga qaratilgani bilan muhim ahamiyatga ega boʻldi.

Maktabning tennis toʻgaragi aʼzolari boʻlgan 1- va 4-sinflar oʻquvchilari oʻrtasida oʻtkazilgan mazkur musobaqalarda yosh tennischilar oʻzlarining epchillik va chaqqonliklarini amalda namoyish etdilar. Murabbiydan ushbu sport mahoratini oʻrgangan yosh tennischilar musobaqa davomida bir-birlaridan ortda qolmaslikka harakat qildilar.

Guruhlararo oʻtkazilgan qizgʻin bahslarda oʻgʻil bolalar oʻrtasida Joʻrabek Erkayev 1-oʻrinni egallagan boʻlsa, ikkinchi oʻrin Ruslan Olimboyevga, uchinchi oʻrin esa Javlon Chovdirovga nasib etdi.

Qizlar guruhidagi bahslar yanada qiziqarli boʻldi. Oʻzlarining chaqqonligi va epchilligini goʻzal oʻyinlar orqali koʻrsata olgan goʻzal sportchi qizlardan Maftunaxon Qodirboyeva 1-oʻrin sohibasi boʻldi. Rayxona Toʻraboyeva ikkinchi, Maftuna Shukurullayeva esa uchinchi oʻrinni egalladilar.

Bayram munosabati bilan qizgʻin tarzda oʻtkazilgan musobaqa barcha ishtirokchilarda katta taassurot qoldirdi. Boʻlib oʻtgan bahslar yakunida ishtirokchilar musobaqa tashkilotchilari tomonidan munosib ragʻbatlantirildi.

R.YOʻLDOShEVA.