FAVQULODDA VAZIYaTLAP BOʻLIMI XODIMLAPI XALQ SALOMATLIGI UChUN HAP KUNI IShDA, SIZ ESA UYDA QOLIB OʻZ-OʻZINGIZNI, YaQINLAPINGIZNI ASPANG!

Insoniyat tarixida biri-biridan ayanchli oqibatlari  bilan iz qoldirgan baloi-ofatlar koʻp kuzatilgan. Urushlar, davlatlararo  nizolar, qalblarni larzaga soluvchi tabiiy ofatlar yer yuzi xalqlari boshiga mislsiz kulfatlar yogʻdirganini bilamiz. Lekin epidemik ofatlar aynan bir nuqtada boshlanib, urush yoki tabiiy ofat kabi oʻsha hududni zararlab qolmaydi, balki qoʻlsiz, oyoqsiz, shovqin-suronsiz, hech qanday sharpasiz manzil va makon tanlamay, insoniyatga beadad xavf-xatar tugʻdirishi bilan ajralib turadi. Koronavirus pandemiyasi insoniyat uchun ana shunday xavfli “dushman”dir.

Yer yuzi aholisi bu kabi “dushman” bilan har yuz yilda  bir bora duch kelayotganiga tarix guvoh, xususan, 1720-yilda – chumo (oʻlat), 1820-yilda – xolera (vabo), 1920-yilda – ispan grippi  insoniyat boshiga katta kulfatlar solgan boʻlsa, 2020-yilda – koronavirus (COVID-19) pandemiyaga aylanib ulgurdi va 2020-yilning 30-mart sanasigacha koronavirus pandemiyasi kirib borgan jami davlatlardan 33000 nafar kishi ushbu virusni yuqtirib olish oqibatida vafot etdi. Mamlakatimizda ham virusni yuqtirib olgan bemorlar soni ortib bormoqda. Bundan mustasno tarzda kasallikka chalinganlar orasidan sogʻayayotganlar ham qayd etilmoqda.

Virus tarqalishining oldini olish uchun kundan-kunga choralar qatʼiylashtirilmoqda. 24-mart kuni Toshkent  shahrini viloyatlar bilan bogʻlovchi barcha postlar yopildi. Keyinchalik Samarqand, Buxoro, Navoiy va Zarafshon shaharlari ham transport harakati uchun yopildi. Bundan avval vodiy viloyatlari va Guliston shahri ham transport yoʻlaklarini yopgan edi. 30-martdan eʼtiboran esa bir viloyatdan ikkinchi viloyatga oʻtish, shuningdek, Toshkent va Nukus shaharlari hamda viloyat markazlariga avtotransport vositalari kirish-chiqishi batamom toʻxtatilib, faqat belgilangan turdagi avtomobillar davlatning maxsus stikeri bilan harakatlanishiga ruxsat berildi. Toʻy-tantanalar, oilaviy marosimlarni oʻtkazish vaqtincha toʻxtatildi. Hatto dafn marosimlarini oʻtkazishda faqat oila aʼzolari, tugʻishgan qarindoshlargina ishtirok  etishi diniy idoralar tomonidan belgilab qoʻyildi.

Ana shunday sharoitda yurtdoshlarimizning karantin qonun-qoidalariga qatʼiy amal qilishi talab etiladi va bu talab oʻz navbatida xalqimizning salomatligini, tinch-osoyishtaligini taʼminlaydi.

Shularni inobatga olgan holda tuman Favqulodda vaziyatlar boʻlimi xodimlari tomonidan qarantin qoidalariga amal qilish, tumanimiz aholisi sanitariya-osoyishtaligini taʼminlashga qaratilgan keng miqyosli  tadbirlar amalga oshirilmoqda. Xususan, boʻlim xodimlari aholi zich yashaydigan mahallalarda, oziq-ovqat mahsulotlari bilan savdo qiluvchi doʻkonlarda, “Mangʻit dehqon bozori” hududida koronavirus infektsiyasidan saqlanish yuzasidan targʻibot-tashviqot ishlarini olib borish bilan birga, oziq-ovqat mahsulotlarini xarid qilish uchun kelgan fuqarolarga koronavirus pandemiyasi va undan saqlanish boʻyicha tavsiyalardan iborat bukletlar tarqatishmoqda.

Koronavirus infektsiyasi tarqalib ketishining oldini olish boʻyicha tuman Favqulodda vaziyatlar boʻlimi va Sanitariya epidemiologiya osoyishtalik markazi xodimlari hamkorlikda Isuzu ATs-50 yongʻin oʻchirish avtomobilida “Mangʻit dehqon bozori” va tumandagi barcha jamoat transportlarida 47 ta, “Amudaryotrans”ga qarashli 42 ta, jami 156 ta jamoat avtotransportlarida har 4 soatda dezinfektsiya ishlari oʻtkazilmoqda. “Mangʻit dehqon bozori” hududidagi 1000 kvadrat metr maydonga, bozor hududidagi savdo majmualarida esa 550 kvadrat metr maydonga, tuman markaziy avtoturargohi hududida 90 kvadrat metr maydonga, shuningdek, tuman Bandlikka koʻmaklashish, Agrobank hamda tuman FVB binolari va bozor atrofidagi koʻchalarga, tuman Xalq taʼlimi boʻlimi binosi, 87 ta maktab va maktabgacha taʼlim muassasalari. oila va mahallani qoʻllab-quvvatlash markazi binolarida profilaktik dezinfektsiya ishlari muntazam ravishda olib borilmoqda.

Butun dunyo xalqlari, xususan, mamlakatimiz va tumanimiz aholisi ham sinovli kunlarni boshdan kechirmoqda. Ana shunday sinovli damlarda fuqarolarimizdan zarur boʻlmagan holatda koʻchaga chiqmasliklarini, oraliq masofani saqlagan holatda soʻzlashishni, kundalik hayotda oddiy tozalik qoidalariga rioya qilishlarini soʻrab qolamiz.

Qator soha xodimlarining “Xalq salomatligini oʻylab, biz ishda qoldik, oʻz salomatligingizni oʻylab, siz uyda qoling!” degan shiorga amal qilgan holda fuqarolarimizni oʻylab, ishda qolib qilayotgan fidoyi mehnatlarini qadrlaylik.

 
B.TAJIBOYeV, tuman Favqulodda vaziyatlar boʻlimi FVDT va FM

faoliyatini tashkil etish xavfsizlik boʻlinmasi boshligʻi, katta leytenant.