SEO MARKAZI TOMONIDAN “COVID-19” INFEKTsIYaSI TUMANIMIZ HUDUDIGA KIRIB KELIShINING OLDINI OLISh BOʻYIChA BARChA ChORA-TADBIRLAR KOʻRILMOQDA

Butun dunyoda pandemik holatda tarqalayotgan koronavirus infektsiyasining oldini olish boʻyicha chora-tadbirlar ishlab chiqilib, shu asosda tumanimizdagi barcha davolash-profilaktika muassasalarida tibbiyot xodimlarining hushyorligini oshirish maqsadida koronavirus infektsiyasining etiologiyasi, epidemiologiyasi, klinikasi va oldini olish chora-tadbirlari toʻgʻrisida seminarlar oʻtkazildi. Xitoy xalq Respublikasidan va kasallik qayd qilingan boshqa davlatlardan kelgan fuqarolarimizdan 148 nafari oila aʼzolari bilan birga tibbiy kuzatuvga olindi.

Tumanimizda kasallik qayd qilingan vaziyatda shifoxonalarni va tibbiyot xodimlarini qayta mobilizatsiya qilish ish rejasi va birlamchi kasallik qayd qilingan vaqtda shoshilinch ish olib borish boʻyicha davolash-profilaktika muassasalari va Sanitariya epidemiologiya-osoyishtalik markazining ish rejalari ishlab chiqildi.

Mazkur reja asosida kasallik oʻchoqlarida nazoratni kuchaytirish kasallikning oldini olish chora-tadbirlarini oʻtkazish uchun maxsus himoya kiyimlari, dezinfektsiyalovchi moddalar va vositalar bilan yetarli taʼminlandi hamda zahirasi yaratildi.
Davolash-profilaktika muassasalarida koronavirus kasalligi qayd qilingan taqdirda izolyator, bemorlarni yotqizish uchun yuqumli kasalliklar boʻlimi, gumon qilingan bemorlar uchun 1-sonli qishloq oilaviy poliklinikasi binosi, muloqotda boʻlganlar uchun akademik litsey yotoqxonasi, tumandan chiqib ketuvchi fuqarolar uchun Mangʻit mehmonxonasi binolarini tayyor holatga keltirish boʻyicha zarur choralar koʻrildi.

Oʻzbekiston Respublikasi Bosh vaziri A.Aripovning 2020-yil 12-mart kungi “Oʻzbekiston Respublikasiga koronavirus infektsiyasi kirib kelishining oldini olish borasida koʻriladigan chora-tadbirlar ham aholining sanitariya-epidemilogik osoyishtaligini taʼminlash borasida birinchi navbatda amalga oshiriladigan vazifalar” toʻgʻrisidagi 5-sonli bayoni va Oʻzbekiston Respublikasi Bosh Davlat sanitariya vrachining 2020-yil 14-mart kungi 4-sonli qaroriga asosan tumanimizda ham tegishli choralar koʻrildi. Koronavirus infektsiyasining kirib kelishi va tarqalishining oldini olish maqsadida tuman SEO markazi tomonidan tuman hududidagi barcha oziq-ovqat va umumovqatlanish joylari, toʻyxonalar, 87 ta umumtaʼlim maktablari, sobiq 3-sonli Akademik litsey yotoqxonasi, 51 ta maktabgacha taʼlim muassasalarida, barcha ishlab chiqarish va sanoat korxonalari, muassasa va tashkilotlar, jamoat transportlari, avtobuslar, marshrutli taksilar, ovul va mahallalar fuqarolar yigʻini binolari, maishiy xizmat koʻrsatish obʼektlari, tijorat banklari, dorixonalar, istirohat bogʻi, harbiy qism binolari, davlat xizmatlari binosi, shuningdek, “Mangʻit Dehqon bozori” va jamoat joylarida dezinfektsiya ishlari olib borildi. Ayni paytda tuman Favqulodda vaziyatlar boʻlimi bilan hamkorlikda har 4 kunda dezinfektsiya tadbirlarini muntazam ravishda oʻtkazish yoʻlga qoʻyildi.

Koronavirus infektsiyasi toʻgʻrisida ommaviy axborot vositalari orqali aholiga oʻrtasida tushuntirish ishlari olib borilib, koronavirus infektsiyasi profilaktikasi boʻyicha plakatlar, eslatmalar, bukletlar tarqatildi. Bundan tashqari, Oʻzbekiston Respublikasiga koronavirus infektsiyasi kirib kelishining oldini olish borasida tumanimizda QR SEOMning chiqish xatiga asosan tibbiyot xodimlari oʻrtasida oʻquv-seminar mashgʻulotlari oʻtkazilib, tegishli choralar koʻrildi.

T.Boboniyozov, tuman SEO markazi bosh shifokori.