BIRDAM BOʻLAYLIK

Butun dunyo hamjamiyati qattiq tashvishda ekanligi, koronavirus pandemiyasi bilan kasallanganlar soni keskin koʻpayib ketayotganligi har birimizga maʼlum.

Keyingi kunlarda mamlakatimizda koronavirus yuqtirgan kishilar soni kun sayin ortib bormoqda. Eng yomoni, kasallikning yashirin davri 10-12 kunni tashkil qilib, inson oʻzini sogʻlom sezarkan va kasallik alomatlari bu davrda sezilmas ekan. Bu davrda ular boshqa insonlar bilan muloqotga kirishadilar, demak, kasallik virusi boshqa sogʻlom insonlarga yuqishda davom etaveradi.

Ommaviy axborot vositalarida, ijtimoiy tarmoqlarda kasallik va uning tarqalib ketishining oldini olish boʻyicha mutaxassislar jon kuydirishayotir, Sogʻliqni saylash vazirligi tomonidan har kuni xalqimizga zarur tavsiyalar berilmoqda.
Lekin ming afsuski, beparvolik va loqaydlik qon-qonimizga singib ketganmi, yurtdoshlarimiz negadir bu tavsiyalarga eʼtiborsizlik bilan qarashmoqda.

Oddiygina misol, “Mangʻit Dehqon bozori” hududida odam koʻp, ishi bor ham, ishi yoʻq ham yuribdi bozorda. Oʻzaro gaplashib turganlar, biri-biriga quchoq ochayotganlar ham bor.

Hukumat oʻquvchilarni himoya qilaylik, deb ularga taʼtil berdi, lekin bozorda maktab yoshidagi bolalarini ergashtirib yurgan ota-onalarni ham uchratdim.

Yoshlar Ittifoqi tuman Kengashi faollari, tadbirkorlar, deputatlar xayriya qilmoqdalar, bepul oziq-ovqat mahsulotlari, niqoblar tarqatmoqdalar. Bu narsa elning ogʻzibirchiligini, yaxshilar koʻpligini koʻrsatadi. Lekin baʼzan tarqatilgan mahsulotlar oʻzining haqiqiy egalariga berilmayapti. Bozorga kelgan olmoqda, haqiqiy muhtojga esa yoʻq!

Bir-ikki marta sport maydonchasida futbol oʻynayotgan bolalarni, bogʻcha yoshidagi velosiped haydab yurgan bolachalarni uyiga joʻnatib yubordim. Tavba, deyman, bu bolalarning ota-onalari bugungi vaziyatdan bexabarmilar? Axir bu hukumatning talabiga va xalqqa hurmatsizlik emasmi? Hukumat kim uchun “Uyda qoling!” deyapti? Albatta, biz – xalq sogʻligi uchun-ku!

Koʻpchilik insonlar niqoblarning qancha vaqt ishlatilishini ham bilmaydilar. Baʼzan kir-chir niqoblar taqib olganlarni koʻrib qolamiz.

Oʻquvchilar uchun 1-apreldan onlayn darslar boshlandi. Oʻqituvchilar, sinf rahbarlari telegram kanalida guruhlar ochib, savollar tashlab, oʻquvchilarning bilimini baholashmoqda. Tushunmagan savollar oʻqituvchi yordamida yechilmoqda. Bu oʻrinda baʼzi ota-onalar farzandlariga koʻmaklashmoqda, hamkorlik qilishmoqda. Lekin beeʼtibor, loqayd ota-onlarning mavjudligi, farzandi uchun sharoit yaratib bermayotganligi bizni ranjitadi.

Men bu fikrlarim bilan birovni yomonlamoqchi, yo ranjitmoqchi emasman-u lekin bozordagi sotuvchi ayollar doimiy niqobda emasligi, birov yaqinlashsa taqib, ketgach, yechib qoʻyayotgani, sotuvchilarning birortasida rezina qoʻlqop yoʻqligi juda achinarli.
Prezidentimiz Oʻzbekiston xalqiga yana bir marta murojaat qildilar. Murojaatda hech bir inson eʼtibordan chetda qolmasligi, muhtoj oilalarga ijtimoiy yordam berilishi, tadbirkorlarga, ishlab chiqarish va xizmat koʻrsatish sohasida yengillik berilishini taʼkidlab oʻtdilar. Xalqimizdan uydan chiqmay oʻtirish, karantin qoidalariga rioya qilish talab qilinmoqda. Murojaatda qayd etilgan vazifalar har bir insonning bugungi asosiy vazifasi boʻlishi kerak.

Shu oʻrinda Murojaatda taʼkidlanganiday, kunni-kunga, tunni-tunga ulab, fidoyilarcha mehnat qilayotgan shifokorlarimizga tahsinlar aytsa arziydi.

Koronavirusni yengish oʻz qoʻlimizda. Agar sanitariya-gigiyena talablariga rioya qilsak, karantin qoidalarini toʻliq bajarsak, bir-birimizni maʼnaviy qoʻllab-quvvatlasak, albatta, bu tilsiz yovni yengamiz. Birdam boʻlaylik, beparvolik, loqaydlikni tashlab, har bir hodisaga ongli munosabatda boʻlaylik!

S.XOʻJAMURODOVA,
Qoraqalpogʻiston Respublikasi Joʻqorgʻi Kengesi deputati.