SINOVLI KUNLARDA XALQ QALBIDA JOʻSh URGAN QADRIYaT

Prezidentimiz joriy yilning 20-aprel sanasida sanoat, qurilish va infratuzilma tarmoqlari korxonalarining toʻliq ishlashini taʼminlash masalalariga bagʻishlangan videoselektor yigʻilishini oʻtkazdi. Davlatimiz rahbari yigʻilishda aholining  ijtimoiy himoyaga muhtoj qatlamini himoya qilish masalasiga alohida toʻxtaldi. Vaqtincha ishlamayotgan, yordamga muhtoj oilalarni aniqlab, ularni manzilli qoʻllab-quvvatlash zarurligini taʼkidladi. Shuningdek, Prezidentimiz Oʻzbekiston xalqining tarixiy-maʼnaviy qadriyatlarini, mehr-oqibat, saxovat va himmat kabi yuksak insoniy fazilatlarini inobatga  olgan holda mamlakatimizda “Saxovat va koʻmak” umumxalq harakatini yoʻlga qoʻyish tashabbusini ilgari surdilar.

“AMUDARYOTEX” xorijiy korxonasi rahbariyati ham “Saxovat va koʻmak” umumxalq harakatiga oʻz hissasini qoʻshishga qaror qildi. Aytish oʻrinliki, “Saxovat va koʻmak” umumxalq harakati doirasida hech kim mehr va eʼtibordan chetda qolmasligi uchun har bir tadbirkor faollik koʻrsatmoqda. Bu jarayonda vaqtincha ishlamayotgan va kunlik daromad asosida yashab kelgan fuqarolarga birinchi navbatda yordam koʻrsatilmoqda.

Maʼlumki, mamlakatimizda karantin tufayli cheklovlar joriy etilganidan soʻng aholiga 27 turdagi oziq-ovqat mahsulotlari arzon narxlarda yetkazib berila boshlandi. Oq oltin ovuli aholisiga ham “Qadamboy Amirxon” masʼuliyati cheklangan jamiyati tomonidan 3 tonna un mahsulotlari arzon narxda yetkazib berildi. Bu jarayon Oʻzbekiston Respublikasi Bosh Prokuraturasi huzuridagi Iqtisodiy jinoyatlarga qarshi kurashish Departamentining tuman  boʻlimi tomonidan alohida nazoratga olindi. Shuningdek, shu kuni Bobur nomli ovul aholisi uchun ham arzon narxlarda 3 tonna un mahsuloti tarqatildi.

Prezidentimizning “Saxovat va koʻmak” umumxalq harakati tashabbusini qoʻllab-quvvatlagan Qilichboy ovuli hududidagi “Amirxon” fermer xoʻjaligi raisi Otaxon Qurboniyozov esa qutlugʻ Ramazon oyi arafasida ovuldagi 20 ta kam taʼminlangan oilaning har biriga 50 kilogramdan jam 1 tonna bugʻdoy, kundalik ehtiyojlari uchun yogʻ, sovun, shuningdek tibbiy niqoblar ehson qildi. Ushbu mahsulotlarga ehtiyoj sezayotgan oilalar ularni yetkazib bergan fermerga oʻz minnatdorchiligini bildirdi.

 “Saxovat va koʻmak” umumxalq harakati tashabbusini qoʻllab-quvvatlashni oʻz insoniylik burchi deb bilgan xalq deputatlari tuman Kengashi deputati Hamro Xoʻjayev Oʻrta qalʼa ovulidagi 12 ta kam taʼminlangan oilalarning har biriga 190 ming, jami 2 mln. 280 ming soʻmlik kundalik oziq-ovqat mahsulotlarini homiylik yordami sifatida tarqatdi. Shuningdek, ovuldagi kam taʼminlangan xonadonlarga Homiylik xayriyalarini muvofiqlashtirish markazi tomonidan har biriga 90 ming soʻmlik kundalik oziq-ovqat mahsulotlari yetkazib berildi. Bundan tashqari, deputat Hamro Xoʻjayev rahbarlik qilayotgan “Suv qurilish boshqarmasi” hamda “Amudaryo Mangʻit yuksalish” masʼuliyati cheklangan jamiyatlari 20 ga yaqin oilalarda yashovchi 100 nafar aholini homiylikka olib, 3 oy davomida ularga jami 55 million soʻmlikka yaqin xomiylik va xayriya yordamlarini koʻrsatishni niyat qilishgan.

Oʻrta qalʼa ovuli hududida oʻz faoliyatlarini olib boruvchi “Xoʻjakoʻl” fermer xoʻjaligi ham ushbu xayrli tashabbusga hissa qoʻshib, vaqtincha ishlamayotgan va kunlik daromad asosida yashab kelgan fuqarolarga 3 oy davomida kundalik isteʼmol mollari hamda oziq-ovqat mahsulotlarini yetkazib berishga bel bogʻlashgan.

Saxovatpesha tadbirkorlar orasida “Saxovat va koʻmak” umumxalq harakati tashabbusini qoʻllab-quvvatlayotganlar talaygina. Xususan, tadbirkor Dilbar Yangiboyeva tomonidan beshta, “Ram Xaytimbat” fermer xoʻjaligi tomonidan toʻrtta, “Yergulobod” fermer xoʻjaligi tomonidan uchta oilaning har biriga 60 ming soʻmlik oziq-ovqat mahsulotlari xayriya qilingan boʻlsa, “Nur” savdo doʻkoni tomonidan ovuldagi Olimboy Jumaniyozovning 500 ming soʻmlik kommunal toʻlovlari toʻlab berildi. “Yusufxoʻja” fermer xoʻjaligi tomonidan ikkita oilaning har biriga 250 ming soʻmlik kundalik oziq-ovqat mahsulotlari xayr-ehson tariqasida yetkazildi.

Prezidentimiz tomonidan ilgari surilgan “Saxovat va koʻmak” umumxalq harakati tumanimiz boʻylab keng quloch yoymoqda. Ramazon oyi kirib kelgan qutlugʻ kunlarda boshlanayotgan bu tashabbus sinovli kunlarda har bir yurtdoshimiz qalbida yanada joʻshqinlik kasb etmoqda.

Robiya YOʻLDOShEVA.