Tadbirkorlarga koronavirus sababli berilayotgan imtiyozlar keng tushuntirilmoqda

Pandemiya sababli joriy etilgan karantin dunyodagi barcha davlatlarda iqtisodiy inqirozni yuzaga keltirmoqda. Boshqa mamlakatlar qatori koronainqiroz yurtimizga ham oʻzining salbiy taʼsirini koʻrsatishi tabiiy. Koronavirus tufayli kelib chiqayotgan bunday oqibatlarning imkon qadar oldini olish choralarini koʻrish maqsadida davlatimizda bir qator normativ hujjatlar qabul qilindi.

Prezidentimiz “Koronavirus pandemiyasi va global inqiroz holatlarining iqtisodiyot tarmoqlariga salbiy taʼsirini yumshatish boʻyicha birinchi navbatdagi chora-tadbirlar toʻgʻrisida”gi PF-5969-sonli Farmoni bilan iqtisodiyot tarmoqlariga koronavirus pandemiyasi va global inqiroz holatlarining salbiy taʼsirlarini yumshatish boʻyicha choralar toʻplamini tasdiqladi. Bosh vazir boshchiligida Inqirozga qarshi kurashish respublika komissiyasi tashkil etildi.

Tumanimizda ham belgilangan mazkur chora-tadbirlar asosida qator amaliy ishlar bajarilmoqda. Oziq-ovqat mahsulotlari narxlarining asossiz oshirilishiga yoʻl qoʻymaslik, zarurat boʻlmaganda koʻchaga chiqmaslik boʻyicha doimiy ravishda targʻibot, tushuntirish ishlari olib borilmoqda. Ijtimoiy himoyaga muhtoj fuqarolar faol qoʻllab-quvvatlanmoqda. Tuman Davlat Soliq inspektsiyasi tomonidan masʼul mutasaddilar bilan hamkorlikda bu boradagi chora-tadbirlarni amalga oshirish bilan birga tadbirkorlarga pandemiyaning iqtisodiyotga salbiy taʼsirini yumshatish hamda aholi, tadbirkorlik subʼektlarini qoʻllab-quvvatlash boʻyicha Prezident Farmonlari, unga koʻra joriy etilayotgan imtiyozlar haqida tushunchalar berib borilmoqda.  

Aytish joizki, aholini samarali ijtimoiy qoʻllab-quvvatlash boʻyicha Farmonda belgilangan chora-tadbirlarga muvofiq endilikda fuqarolarga soliq imtiyozlari va ularni toʻlashni kechiktirish imkoniyati taqdim etiladi. Shuningdek, 2019-yil uchun jismoniy shaxslarning jami yillik daromadlari toʻgʻrisidagi deklaratsiyani taqdim etish muddati 2020-yil 1-avgustga qadar uzaytiriladi. Bundan tashqari, jismoniy shaxslar tomonidan mol-mulk soligʻi va yer soligʻini toʻlash muddati 15-apreldan 15-oktyabrga qadar uzaytiriladi.

Soliq inspektsiyasi masʼullari tumandagi oziq-ovqat va ruxsat berilgan boshqa mahsulotlar savdo-sotigʻini amalga oshirayotgan yakka tartibdagi tadbirkorlar, ishlab chiqarish bilan shugʻullanayotgan tadbirkorlik subʼektlari egalariga Farmonga muvofiq berilayotgan imtiyozlar haqida batafsil maʼlumotlar berdilar. Ularga iqtisodiyot, ayniqsa, tadbirkorlikni qoʻllab-quvvatlash boʻyicha yil oxirigacha soliq auditiga moratoriy oʻrnatilganligini, yuridik shaxslarga mol-mulk soligʻi, yer soligʻi va suv resurslaridan foydalanganlik uchun soliqni toʻlash boʻyicha 6 oyga kechiktirish, yaʼni boʻlib-boʻlib toʻlash taqdim etilganligini, shu yil 1-apreldan 1-oktyabrgacha boʻlgan davrda yakka tartibdagi tadbirkorlar uchun ijtimoiy soliq 50 foizga qadar, yaʼni 223 ming soʻmdan 111,5 ming soʻmgacha kamaytirilganini maʼlum qilishdi.

Global inqiroz holatlarining iqtisodiyot tarmoqlariga salbiy taʼsirini kamaytirish boʻyicha qabul qilingan Prezident Farmoniga koʻra qishloq xoʻjaligidagi yerlarni sugʻorish uchun suv resurslaridan foydalanganlik uchun soliq stavkalari 50 foizga pasaytiriladi. Shuningdek, 1-oktyabrgacha boʻlgan davrda tashqi savdo operatsiyalari boʻyicha muddati oʻtgan debitor qarzdorlik uchun xoʻjalik yurituvchi subʼektlarga jarimalar qoʻllash toʻxtatiladi. Eksportni qoʻllab-quvvatlash boʻyicha tadbirkorlarga nisbatan jarima sanktsiyalarini oldini olish uchun fors-major holatlari kelib chiqqanligi haqida rasmiy xabarnoma eʼlon qilinadi. Tadbirkorlarga yillik umumiy eksportga nisbatan 10 foizdan oshmagan muddati oʻtgan debitor qarzdorligi mavjud boʻlgan taqdirda, kafolatlangan toʻlovni taʼminlamasdan tovarlar eksportini amalga oshirishga ruxsat beriladi.

Tuman Soliq inspektsiyasi masʼullari vaqtincha qiyinchiliklarni boshdan kechirayotgan xoʻjalik yurituvchi subʼektlarga mol-mulk soligʻi, yer soligʻi va suv resurslaridan foydalanganlik uchun soliq boʻyicha penyalar hisoblanishi toʻxtatib turilishini, soliq qarzini majburiy undirish choralari koʻrilmasligini ham maʼlum qilishdi. Shu qatorda soliq toʻlovchilarning davlat soliq xizmati organlariga tashrif buyurmasdan soliq majburiyatlarini bajarishi uchun ularga masofadan xizmat koʻrsatishni kengaytirish choralari koʻrilayotgani va boshqa berilayotgan shu kabi imtiyozlar haqida maʼlumotlar berishdi.

Tadbirkorlar soliq inspektsiyasi masʼullariga oʻzlarini qiziqtirgan savollar bilan murojaat qilib, batafsil tushunchalarga ega boʻldilar.

O. Xudoyberganova.