NAZORAT TADBIRLARI DAVOM ETMOQDA

Yurtimizda koronavirusga chalinish, kasallikning yangi oʻchoqlari paydo boʻlish holatlarining kamaymayotgani aholidan   kasallikka qarshi kurash borasida oʻrnatilgan karantin talablariga qatʼiy rioya qilishni  taqozo qilmoqda. Tumanimizda bu boradagi ahvol muntazam nazorat qilinib, aniqlangan kamchiliklar boʻyicha  profilaktik tushuntirish ishlari muntazam  olib borilayotir.

     Shu yilning 22-iyunida Milliy gvardiya xodimi Marat Abdiyev, Qoraqalpogʻiston Respublikasi sanitariya epidemiologiya osoyishtalik xodimi Roxat Xojalapesov, tuman Ichki ishlar boʻlimi profilaktika inspektori Amangeldi Nagmetov, Qoraqalpogʻiston Respublikasi Sanitariya epidemiologiya nazorati boshqarmasi  tuman filiali inspektori Norgul Atabayevalar ishtirokida tumanimizda navbatdagi nazorat tadbirlari oʻtkazildi.

      Qoraqalpoq hududiy elektr taʼminoti aktsiyadorlik jamiyatining tuman filialida  koronavirus infektsiyasiga qarshi kurashish chora-tadbirlariga amal qilinish holati oʻrganilganida filial binosi kirish eshigiga dezinfektsion toʻshama qoʻyilmagan, eshiklar tutqichlari xlorli dezinfektsiyalangan mato bilan oʻralmaganligi maʼlum boʻldi. Idora xodimlarining va tashrif buyuruvchilarning kelib-ketishlari maxsus jurnalga  qayd etilmagan, keluvchilarning tana haroratini oʻlchash uchun teplovizor, antiseptik vositalar mavjud emasligi aniqlandi. Shuningdek, ayrim xodimlar tibbiy niqobsiz ishlashmoqda, karantin qoidalari haqida eslatmalar ham yoʻq, tashrif buyuruvchilar orasida oraliq masofa saqlanmayapti. Aniqlangan kamchiliklar boʻyicha korxona rahbari, xodimlariga tushuntirish ishlari olib borildi va bayonnoma rasmiylashtirildi.

       Chordara mahallasining “Ozodlik” koʻchasida joylashgan Ravshan Otajonovaga qarashli milliy shirinliklar va qandolat mahsulotlari bilan savdo qiluvchi doʻkonda ham kirish eshikka dezinfektson toʻshama qoʻyilmagan, eshik tutqichlariga xlorli matolar bilan ishlov berilmagan, karantin qoidalariga amal qilish boʻyicha eslatmalar qoʻyilmaganligi aniqlandi. Xuddi shunday kamchiliklar “Buyuk Turon” koʻchasida joylashgan “Ilhom xonqa” doʻkonida ham mavjudligi, sotuvchilar tibbiy niqob taqmasdan savdo qilishayotganligi uchun tadbirkorga nisbatan maʼmuriy bayonnoma rasmiylashtirildi.

       Ushbu mahallada yangidan qurilayotgan binoda uch nafar fuqaro tibbiy niqob taqmasdan ishlayotganligi aniqlanib, ularga profilaktik tushuntirish ishlari olib borildi va maʼmuriy bayonnoma tuzildi. Mangʻit Dehqon bozori atrofidagi oshxona-kafelar  karantin qoidalariga zid ravishda faoliyat yuritayotgani yetmaganday, xizmatchilari maxsus kiyim, qoʻlqoplarsiz xizmat koʻrsatishayapti, tibbiy niqoblarni ham notoʻgʻri taqishgan. Bu haqda ham maʼmuriy bayonnoma tuzilib, tegishli tartibda javobgarlik belgilandi. Shuningdek, Buyum bozorida nazorat  tadbirlari davom ettirilganida baʼzi sotuvchilar tibbiy niqobsiz faoliyat yuritayotganliklari, bozorga kelgan baʼzi fuqarolar niqobni qoidaga rioya qilmasdan taqsa, baʼzilari umuman niqobsiz yurishgani aniq boʻldi. Bozor kirish eshigi oldiga maxsus dezinfektsion barer oʻrnatilgan. Maxsus xodim  shaxsiy himoya kiyim va teplovizor bilan taʼminlangan. Bozor ichida joylashgan  Nodira Xudoyberganovaga qarashli kiyim tikish tsexi  chevarlari esa tibbiy niqobsiz faoliyat yuritayotganliklari aniqlandi. Shuningdek, bozor hududida ham tibbiy niqobsiz harakatlanayotgan bir necha fuqarolar aniqlanib ogohlantirildi va profilaktik tushuntirish ishlari olib borildi. Nazorat tadbirlari shuni koʻrsatdiki, koronavirus pandemiyasiga qarshi kurash choralariga  hamma ham birday amal qilmayapti.

   Yurtimizda koronavirus pandemiyasi tezroq bartaraf etilib, tinch-osoyishta kunlarga yetishni hammamiz ham chin koʻngildan istaymiz, shunga umid qilamiz. Buning uchun esa hamjihatlikda, karantin qoidalariga qatʼiy amal qilgan holda kurashishimiz lozimligini ham unutmaylik!

 Oygul RAJABOVA.