Agrar soha xodimlari pandemiya davrida ham moʻl qishloq xoʻjaligi mahsulotlari yetishtirish yoʻlida mehnat qilishmoqda

Ayni kunlarda amudaryolik fermer xoʻjaliklari ijarachilari gʻoʻza nihollarini sugʻorish, gʻalladan boʻshagan maydonlarga takroriy ekinlar ekish ishlarini jadallik bilan olib borishib, moʻl hosil yetishtirish orqali tuman iqtisodini yuksaltirishga harakat qilishayapti.

Qangli ovulidagi “Aytimbetov Qurbonboy” fermer xoʻjaligida 60 gektar maydonga ekilgan gʻoʻza nihollarini birinchi sugʻorish tadbiri sifatli yakunlandi.

Paxtachilikdan koʻzlanganiday hosil olishda gʻoʻza parvarishi davridagi agrotexnik tadbirlarning, ayniqsa, sugʻorishning oʻz vaqtida va sifatli oʻtkazilishi juda muhim. Buni yaxshi his qilgan xoʻjalik ijarachilari barcha dalalardagi gʻoʻza nihollarining meʼyorida sugʻorilishiga erishdilar. Natijada barcha dalalardagi nihollar gullab, hosil  nishonalarini tugmoqda.

Mazkur xoʻjalikda paxtadan tashqari bogʻdorchilik, asalarichilik va baliqchilik tarmoqlari ham bor. 3 gektarlik maydonni egallagan bogʻda olma, anor, uzum, oʻrik, nok, behi kabi turli daraxtlar meva berib turibdi. Har bir mevali daraxtning ertagi va kuzgi navlari mavjud. Barcha tarmoqlardan olinayotgan daromad esa xoʻjalik iqtisodining yana ham yuksalishiga, 22 nafar ijarachilarning mehnat haqlari oʻz vaqtida hisob-kitob qilinishiga asos boʻlayotir. Qolaversa, xoʻjalikning moddiy-texnika bazasi mustahkamlanib, surim, chopiq traktorlari xarid qilindi. Bugʻdoydan boʻshagan 8 gektar yerlarga ushbu texnikalar yordamida takroriy ekinlar ekilmoqda.

Shunisi eʼtiborliki, may oyida gʻoʻza nihollari unib chiqqan vaqtida yoqqan kuchli yomgʻirdan talofat koʻrilgan 2 ta kartadagi 5 gektarcha  maydondagi gʻoʻza nihollari alohida parvarish qilinib, oziqlantirilib, yaxshi rivojlanishiga erishildi.

Anvar Kamolov Oq oltin ovulidagi “Kamolov Yendir” fermer xoʻjaligini 7-yildan beri  boshqarib keladi. Xoʻjalikning 70 gektar paxta maydoni 65 nafar ijarachiga boʻlib berilgan. Barcha  ijarachilar ham oʻzlariga birkitilgan maydonlardagi gʻoʻza nihollarini begona oʻtlardan tozalab, qondirib sugʻordilar va yaxshi rivojlanishiga erishmoqdalar.

Xoʻjalikda hosili yigʻishtirib olingan 7 gektar bugʻdoy maydonining 3 gektariga kuzgi sabzi ekish uchun tayyorlandi. Qolgan maydonlarga esa xoʻjalik chorvasi uchun ozuqabop ekinlar ekildi. Yerlarni surish, ekishga tayyorlash kabi ishlarning barchasi xoʻjalikning oʻz texnikalari yordamida bajarilmoqda.

Xoʻjalik ijarachilari barcha ekin maydonlardan moʻl hosil olish, xalqimiz dasturxoni toʻkin-sochin boʻlishiga hissa qoʻshishga astoydil harakat qilishmoqda.

Mamlakatimizda koronavirus pandemiyasi tufayli oʻrnatilgan karantin cheklovlari davrida tumanimiz agrar soha xodimlari barcha ekinlardan moʻl hosil yetishtirib, xalqimiz dasturxoni toʻkin boʻlishi yoʻlida mehnat qilmoqdalar. Bu esa nafaqat fermer xoʻjaliklarining iqtisodi yuksalib, ishchilarning moddiy manfaatdorligi oshishiga, balki mamlakatimiz iqtisodiyoti rivojiga ham munosib hissa boʻlib qoʻshilmoqda.

O.PAJABOVA.