Ishsiz, ijtimoiy himoyaga muhtoj fuqarolar ishga joylashtirilmoqda

Mamlakatimizda qariyb olti oydan beri davom etayotgan koronavirus pandemiyasi tufayli daromadidan ayrilgan, iqtisodiy nochor ahvolga tushib qolgan yoshlarning, ayol-qizlarning bandligini taʼminlashga, ijtimoiy himoya qilishga alohida eʼtibor qaratilmoqda.

Tuman Aholi bandligiga  koʻmaklashish markazi tomonidan ishsiz, chetga ishlashga keta olmagan yoki qaytib kelgan fuqarolarning bandligini taʼminlash uchun ovul va mahallalar fuqarolar yigʻinlari hamkorligida boʻsh ish oʻrinlari haqidagi xabarlar muntazam ravishda eʼlon qilib borilmoqda. Shuningdek, mahalla va xonadonlarga chiqib ishlash mexanizmi joriy etilgan. Joriy yilning yanvaridan iyul oylarigacha boʻlgan davr oraligʻida 1395 nafar aholi jamoat ishlariga jalb qilindi va ularning ish haqi toʻlovi jamgʻarma hisobidan toʻlab berildi.

Obodonlashtirish, koʻkalamzorlashtirish, daraxtlarni oqlash, ularga ishlov berish, ariqlar hamda ichki yoʻllarni tozalash, Obodonlashtirish boshqarmasi va “Toza hudud” korxonasi buyurtmalari boʻyicha markaziy koʻchalar va xiyobonlarni tozalash, koʻkalamzorlashtirish, gul koʻchatlarini ekish va parvarishlash, maishiy chiqindilarni toʻplash hamda olib chiqish kabi ishlarga pandemiya sababli ishsiz qolgan fuqarolar jalb etildi.

Xususan, yangi tashkil etilgan Xotira maydoni hududini obodonlashtirish va koʻkalamzorlashtirishga 50 nafar, Istirohat bogʻiga 70 nafar, Mangʻit shahri ichidagi piyodalar yoʻlakchalarini tartibga keltirish ishlariga 50 nafar, nogironligi bor, ehtiyojmand oilalar hovli-joyini taʼmirlashga 30 nafar fuqaro jalb qilindi.

Shuningdek, fermer xoʻjaliklari va klaster korxonalarning buyurtmasiga koʻra, dala ishlariga 272 nafar fuqarolar ishga joylashtirildi va barchasining oylik maoshlari oʻz vaqtida toʻlab berildi.

Karantin davrida oʻrnatilgan tartib-qoidalar inobatga olingan holda noanʼanaviy va nostandart jamoat ishlari ham joriy etildi. Jumladan, Davlat  sanitariya-epidemiologiya nazorati markazi xodimlariga qoʻshimcha kuch sifatida dizenfektsiyalash ishlariga koʻmaklashish uchun 49 nafar vaqtincha ishsiz fuqarolar, ichki ishlar va Milliy gvardiya xodimlariga amaliy yordam koʻrsatishga 20 nafar, blokpostlarda xizmat koʻrsatishga 10 nafar fuqarolar ishga olindi. Yakka-yolgʻiz, oʻzgalar parvarishiga muhtoj insonlarni parvarishlash uchun 40 nafar oʻrta  tibbiyot xodimlari jalb qilindi.

Sektorlarda oʻtkazilgan oʻrganishlar davomida yanvar-iyul oylarida “Temir daftar”ga kiritilgan 361 ta kam taʼminlangan, ehtiyojmand oilalarning ishsiz aʼzolarning bandligini taʼminlash, daromad topishiga sharoit yaratish maqsadida tomorqasiga yengil tipdagi issiqxonalar qurish, ekin ekish uchun urugʻ, koʻchat xarid qilishi, sugʻorish vositalari xarid qilishi uchun 776,9 mln. subsidiya mablagʻlari berildi.

Shuningdek, joriy yilning birinchi choragida 84 nafar ishsiz fuqaro kasb-hunarga oʻqitilib, ularning ishga joylashishiga koʻmak berildi. Yil boshidan beri 200 nafar ishsiz fuqarolarga ishsizlik nafaqasi tayinlandi va toʻlab berildi.

Tuman Aholi bandligiga koʻmaklashish markazi bundan keyin ham ishsiz, ijtimoiy himoyaga muhtoj fuqarolar uchun yangi ish oʻrinlari yaratish, ularning oilasida daromad manbalari koʻpayishiga va pirovardida mamlakatimiz iqtisodi yuksalishiga oʻz hissasini qoʻshishda davom etadi.

Alisher SOBIROV, tuman Aholi bandligiga koʻmaklashish markazi direktori.