TUMAN XOTIN-QIZLAR JAMOATChILIK KENGAShINING ASOSIY VAZIFALARI BELGILANDI

Jamiyatimizda xotin-qizlarning ijtimoiy faolligini oshirish, mahalla va oilani qoʻllab-quvvatlash, ayolning jamiyatda va oilada tutgan nufuzini mustahkamlash uchun amalga oshirilayotgan ishlar salmogʻini yanada yuqori pogʻonaga koʻtarish maqsadida keng qamrovli ishlar amalga oshirilmoqda. 2020-yilning 18-fevral sanasida Prezidentimiz tomonidan “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi 5938-sonli Farmoni hamda ushbu Farmon ijrosini taʼminlashga qaratilgan Oʻzbekiston Respublikasi Vazirlar Mahkamasining 2020-yil 14-avgust sanasida “Qoraqalpogʻiston Respublikasi, viloyatlar va Toshkent shahrida hamda tuman (shahar)larda xotin-qizlar jamoatchilik Kengashlarini tashkil etish toʻgʻrisida”gi 486-sonli Qarori qabul qilingani Mahalla va oilani qoʻllab-quvvatlash borasidagi ishlar salmogʻini oshirdi. Ushbu hujjatlar mahalla va oila institutini yanada takomillashtirish imkonini berdi.

Yuqoridagi Prezident Farmoni va hukumat Qarori bilan Oʻzbekiston Respublikasi Mahalla va oilani qoʻllab-quvvatlash Vazirligi hamda Qoraqalpogʻiston Respublikasi Mahalla va oilani qoʻllab-quvvatlash Vazirligining tegishli buyruqlariga asosan tumanimizda ham xotin-qizlar jamoatchilik Kengashi faoliyatini tashkil etish boʻyicha tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova rahbarligida Ishchi guruh tuzildi. Shuningdek, tuman xotin-qizlar jamoatchilik Kengashining 15 kishidan iborat aʼzolari tarkibi tasdiqlandi va Nizomi ishlab chiqildi.

Joriy yilning 23-sentyabr sanasida tuman xotin-qizlar jamoatchilik Kengashining birinchi tashkiliy yigʻilishi boʻlib oʻtdi. Yigʻilishni tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova ochdi va xotin-qizlarni qoʻllab-quvvatlash, ularning huquqlari hamda  qonuniy manfaatlarini himoya qilish, xotin-qizlarning  ijtimoiy-siyosiy hayotdagi roli va faolligini oshirish boʻyicha Nizom talablariga muvofiq takliflar ishlab chiqish, muammolar yechimi yuzasidan aniq va qatʼiy rejalar asosida faoliyat yuritish xotin-qizlar jamoatchilik Kengashining asosiy vazifasi ekanligiga batafsil toʻxtaldi.

Shundan soʻng, 40-sonli maktab direktori, Qoraqalpogʻiston Respublikasi Joʻqorgʻi Kengesi deputati Sanobar Xoʻjamurodova Kengash Ishchi guruhi tomonidan ishlab chiqilgan Nizom yuzasidan Kengash aʼzolariga batafsil maʼlumot berdi. Shu bilan birga tumanimiz faol ayollarini birlashtirgan xotin-qizlar jamoatchilik Kengashi oldida turgan dolzarb vazifalar xususida toʻxtalib oʻtdi.

Tuman xotin-qizlar jamoatchilik Kengashi Nizomida belgilangan vazifalar yuzasidan “Taraqqiyot koʻzgusi” gazetasi maxsus muxbiri Robiya Yoʻldosheva, tuman FHDYo boʻlimi mudiri Sanobar Xolboyeva, xalq deputatlari tuman Kengashi deputati, 31-sonli maktab direktori Nilufar Davletova hamda xalq taʼlimi faxriysi, “Moʻʼtabar ayol” koʻkrak nishoni sohibasi Pardagul Oʻrozboyevalar oʻz fikr va takliflarini bildirdilar. Shuningdek, ishtirokchilar yoshlar tarbiyasi bilan bogʻliq muammolar, ularning  kiyinish va muomala madaniyati, toʻy-marosimlarni oʻtkazish borasidagi kamchiliklar, ijtimoiy himoyaga muhtoj oilalarni qoʻllab-quvvatlash yuzasidan amalga oshirilayotgan ishlarda ayrim ovul va mahalla fuqarolar yigʻinlari masʼullari tomonidan yoʻl qoʻyilayotgan kamchiliklar, yosh oilalarni mustahkamlashga, aholi bandligini taʼminlashga qaratilgan saʼy-harakatlar boʻyicha oʻzaro fikr almashdilar.

Yigʻilishda tuman xotin-qizlar jamoatchilik Kengashi aʼzolari tomonidan bildirilgan fikrlar va takliflar atroflicha muhokama etilib, galdagi vazifalar belgilab olindi.

Gavhar Chimboychiyeva.